La nueva editorial asturiana dedicada a la lliteratura de xéneru, Quanta Media, estrénase güei nel mercáu editorial poniendo a la venta la segunda novela del autor Dam Fernández, Los 7 de Dux, una obra que s’enmarca la ficción científica clásica d’ambientación espacial, pero na que tamién vamos poder alcontrar una hestoria d’aventures, amistá, familia y llucha pola sobrevivencia.
L’autor Dam Fernández (Xixón, 1984) ye escritor y periodista, y nel terrenu de la ficción yá tien publicada la novela de fantasía El roble azul (Radagast, 2022) y collaboró tamién na antoloxía de novela negra Asturies criminal (Radagast, 2022).
La editoral (que por ciertu acepta manuscritos), qu’ufre tamién servicios como axencia de comunicación, da accesu a los primeros capítulos d’esta primer novela na so páxina, un avance que por supuestu vos dexamos calcando equí. Ah, y tamién tien fechu un booktrailer, un vidéu que sirve d’anunciu a la novela, y del que tamién vos dexamos l’enllaz equí.
De momentu nun sabemos muncho de qué más obres va asoleyar la editorial, pero promete trayer munces coses atrayibles. Sí sabemos, polo que la editorial cuenta en redes, dalgo de la segunda obra que tien yá en preparación: consise nuna antoloxía con fines benéficos na que participen autores a esgaya, ente los que s’alcuentren dalgunos de la talla de Pilar Sánchez Vicente, Rodolfo Martínez, Ivan Ledesma o Blanca Fernández.
