La estrena de la película Dungeons & Dragons: Honor Among Thieves fai conocer la franquicia a un gran públicu que nun sabía del xuegu de rol, o namás que-y sonaba, lo qu’abre oportunidaes pa que salgan al mercáu toa una riestra de productos nuevos. La empresa propietaria de los drechos, Hasbro (Wizards of the Coast ye sosidiaria d’esta) nun diba desaprovechalo, y yá sacó dellos xuegos de mesa pa una clientela comprendida ente los más espertos y a los que quiciabes-yos mete mieu la complexidá d’un xuegu de rol con toles lletres.
Ye por ello qu’ún de los xuegos anunciaos ye, más o menos a cencielles, un Monopoly, Monopoly Dungeons & Dragons, colos llugares clave de la película en cuenta de les cais, pero tamién con otres modificaciones como que cada ficha de xugador tien una habilidá especial, o la esistencia d’oxetos máxicos y conxuros.
Otru de los productos acabante de salir ye Dungeons & Dragons: Bedlam in Neverwinter, un xuegu de mesa de scape room, nel que cada xugador pue crear un personaxe (escoyendo raza, clas y arma d’iniciu) y xuntos han dir resolviendo les cosadielles que se-yos presenten, rebuscar pelos cuartos y lluchar contra monstruos pa descubrir el misteriu final.
Y tamién ta, yá a la venta, Dungeons & Dragons: The Yawning Portal, un xuegu que mez fantasía y gastronomía (una fusión bien estraña, pero que tien bien d’ésitu en mangues como Dungeon Meshi). Nél póneste nes carnes d’un taberneru que tien de dexar bien alimentaos a los héroes pa que marchen a mazmorriar contentos.
Tocántenes a la próxima edición del xuegu de rol en sí mesmu, la que sedría la sesta y que yá tien trayío polémiques d’enantes (porque Wizards of the Coast tenía la intención de recortar les llibertaes del sistema de xuegu, que permitíen a otres editoriales crear suplementos), agora vien una serie nueva de polémiques, que consistiría nos cambios que quieren facer pa volver el xuegu más políticamente correuto. Va un tiempín qu’anunciaron que cambiaríen el términu “raza” (que distingue si’l personaxe ye humanu, nanu o elfu, por casu) pol de “especie”, lo que nun principiu paecía que diba ser namás un cambiu terminolóxicu, ensin efeutu dalu nel xuegu. Por embargu, agora tamién anuncien que van desaniciar les posibilidaes d’escoyer personaxes híbridos d’ente elles, como quiciabes son les más populares el medio-elfu (de pá elfu y ma humana o al aviesu) y el medio-orcu. Aseguren, dende la compaña, que nun se sienten cómodos con esto por ser “inherentemente racista”, anque munchos se pregunten yá en redes si nun ye enforma más racista impidir el mestizaxe. Esta edición del xuegu nun s’espera hasta 2024.
