Alone in the Dark ye una saga importantísima d’horror, masque lleven una barbaridá d’años ensin sacar una entrega. El primeru de toos, de fechu, ye yá de más de tres décades, de 1992, y sedría difícil imaxinar que sedría de los xuegos d’horror y sobrevivencia ensin él, pos la so influyencia n’otres sagues agora más famoses, como Resident Evil (del que la primer entrega salió en 1997) ye bien evidente.
Quiciabes tuvo que ver con ello l’adaptación fallida a película de 2005, siendo el primer clavu na caxa, o quiciabes la saga taba yá preparada pa morrer. Pero, fuera como fuere, ye verdá que la saga foi perdiendo fuercia colos años y agora hai xugadores que nin oyeron falar d’ella. Tres el pocu ésitu d’Alone in the Dark: Illumination, Atari acabo dexando la franquicia pa prau y vendiéndo-yla a THQ Nordic.
Por embargu, agora l’estudiu Pieces Interactive (que non el formatu de la TPA, pronunciándose /ˈpisəz/) trai de la mano de THQ Nordic, pa xineru de 2024, una entrega nueva: Alone in the Dark, a seques, talamente como’l primeru nun intentu claru de da-y un aire fresco a la saga al empar que “caltener el sentimientu” del xuegu orixinal. Y nada menos que colos actores Jodie Comer (Star Wars: Episode IX, Free Guy) y David Harbour (Stranger Things, Hellboy 3, Black Widow) como protagonistes.
Agora, a otros avances que yá tienen publicao (como aquel gameplay del mes pasáu, que vos dexamos calcndo equí), asoleyen ún especialmente llamaderu porque se centra nes creatures a les que vamos tener qu’enfrentanos, siendo la so orixinalidá ún de los puntos más fuertes del xuegu (dexámosvoslu calcando equí). Yá hai, amás, críticos que tuvieron la suerte de prebalu, y según dicen ye una combinación perentretenida d’esploración, combate y cosadielles.
Y ye qu’Alone in the Dark ñació adaptando les obres de Lovecraft a videoxuegu, y, como yá se tien demostrao en tolos medios posibles, l’escritor de Providence ye atemporal y les sos idees funciones en cualesquier formatu.
