El regresu de Dexter Morgan tres d’ocho años desapaecíu con Dexter: New Blood, miniserie que volvía allá onde lu dexáremos, paez que ye namás el principiu cuando pintaba ser final, porque la canal Showtime tien grandes planes pa tresformar la llicencia (basada nuna saga de noveles) en toa una franquicia.
Y ye que, per un llau, la miniserie va dexar de selo, con una segunda temporada (anque se ñeguen a llamala asina, dicen que ye “la siguiente Dexter: New Blood“) na que vamos ver qué asocede darréu d’esa final tan impautante que nun vamos desvelar por si tovía nun la vistis. Per otru, tán tresnando tamién Dexter: Origins, una “precuela” de la serie orixinal na que vamos ver al nuesu asesín en serie favoritu como un novatu acabante graduase y entrar na policía, col padre y la hermana tovía vivos. Y arriendes d’estes series que van afondar na vida de la familia Morgan enantes y dempués de lo que tenemos visto, y por si fora poco, preparen tamién una riestra de ponderes d’otros personaxes, siendo la que tienen más ellaborada una sobre l’asesín Trinity, el más popular d’ente los sos enemigos.
Dexter foi una serie d’ocho temporaes (2006-2013) basada nuna saga de noveles de Jeff Lindsay, y que nos presenta a un asesín en serie que s’encarga de matar a otros asesinos, usando’l so puestu como forense na policía de Miami p’alcontrar víctimes y atapar les sos buelgues. En 2021 estrenaron Dexter: New Blood, que volvió allá onde lo dexara la serie orixinal (con una final que nun foi del gustu de toos) pa rematar con ella la faena y tentar de satisfacer a los fans.
