La noticia cuerre peles redes y los amantes de la serie tovía nun salen del ablucamientu. Nun ye yá que Max (que ye como se llama agora la canal de streaming de HBO) quiera siguir sacando ponderes de la serie madre, como yá ye casu House of the Dragon o les que tán tresnando, comola “precuela” A Knight of the Seven Kingdoms: The Hedge Knight o The Sea Snake. Ye que la intención ye sacar, y amás dientro de poco, una novena temporada de la serie orixinal. ¿Y cómo? ¿Nun morriera tou Cristu?
Pos va tiempu que se tien falao d’una serie nueva que contara la vida de Jon Snow depués de los acontecimientos del postrer episodiu, y agora asoléyase que la idea ye que seya la continuación, como una temporada más de la serie orixinal que siguiría usto onde acabo la octava. Lo que, ye evidente, resulta muncho más llamadero pa los fans. Y anque ye verdá que la final de la serie foi abondo criticada, pol xiru que tomaron los acontecimientos, esto nun dexa de ser un gran golpe publicitariu.
La hestoria, polo que cuenten, desendolcaríase más allá de la muria, lo qu’al empar de siguir cola mesma hestoria permitiría enanchar el mundu y contar hestories dafechu nueves sobre llugares desconocíos. Y, por supuestu, l’actor Kit Harrington volvería como Jon Snow.
Por embargu, metá la fuelga de guionistes y coles complicaciones que ta trayendo esta a toles grandes productores, la direutiva de Max, Francesca Orsi, tovía nun s’atreve a asegurar tovía que la temporada nueva tenga lluz verde. Mientres, por suerte, paez que la segunda temporada de The House of the Dragon nun ta teniendo problemes nin retrasos nel rodaxe (masque nun puen tener guionistes nel set), y la estrena sigue fechada pal branu del añu viniente.
