Va tiempu que se vien falando d’aparatos pa crear golores artificiales, lo que nun entamu tenía l’envís d’usase nes sales de cine. Asina, si na escena saliera un campu podríemos arrecender les flores, y si saliera l’interior d’una alcantariella… bono, a lo meyor esto de los golores nun ye tan bona idea como pue paecer de mano, ¿non?
Paézanos lo que nos paeza, en Sony piensen que sí lo ye, pos acaben de patentar un periféricu que produz golores combinando dellos básicos (a mou de colores primarios) talamente como’l yá esistente Smell-O-Vision, o l’Aroma Shooter del que vos falábemos va tiempu (equí), y pal qu’hai hasta una páxina na que programen y van xubiendo los golores pa distintes películes y series d’anime.
Asina, la idea sedría qu’al mandu con vibración, los cascos, el micrófonu y les gafes de realidá virtual s’amieste esti aparatu, col que’l realismu de los videoxuegos daría otru nuevu pasu alantre y algamaría otru sentíu más. Eso sí, tovía ta en procesu de prueba y, según comenten en delles páxines, paez presentar dalgunos problemes téunicos que tán produciendo unos cuantos quebraderos de cabeza al equipu encargáu, polo que nun ye probable que s’anuncie dientro poco la so venta. Pero si lu patenten ye por dalgo, paez evidente que la idea ye sacalu más pronto que tarde al mercáu.
¿Cuálu ye l’arume de los praos d’Horizon? ¿A qué fieden los infestaos de The Last of Us? ¿Kratos, protagonista de God of War, báñase davezu o quiciabes ye un poco gochu? ¿Hai un equivalente al maxenta nos golores que t’estropia’l cartuchu al escosar y mándate comprar otru? Estes preguntes tan rares y que nunca nun imaxinaríes que dibes facete puen tener respuesta dientro de mui poco.
