¿Cuántes coses tán mal en Veneciafrenia? ¿Cuántes coses faen d’esta película de mieu que mos acabe dando risa? Milenta. Por eso, vamos entamar pelo bono, que tamién lo hai: Venecia ye guapo. Ye un fechu y na película, pal que tuvo ende, déxase bien a les clares lo guapa que ye la ciudá y lo más tovía que ye nel antroxu. L’usu de les llingües ye tamién dalgo bono a señalar y natural: n’italianu lo que tien que ser n’italianu, en castellán lo que tien que ser castellán (si sacamos la gran casualidá que siempre que salen españoles nuna peli falen castellán ente ellos) y n’inglés lo que tien que dir n’inglés. Per esa parte nada mos saca del realismu. Hasta equí lo bono.
ATENCIÓN DESATAPAMIENTOS
La idea xeneral ye qu’un grupu de turistes viaxa en cruceru y va a Venecia a pasalo bien nun marcu de protestes escontra los cruceros y el dañu que-y tán faciendo a la ciudá. En llegando, van a una fiesta privada y ún desapaez. Los demás vuelven al hotel ensin él y esmolécense. De sópitu, decátense de que naide los cree, porque’l que desapaez perdió’l móvil, el pasaporte, nun figura nel rexitru del hotel y ye a toes lluces como si nun esistiere. Esta lluz de gas que-yos tán faciendo nun se sostién se mire per onde se mire, (como nun se sostién que-y pidan el pasaporte a un ciudadanu de la UE n’Italia)…
La policía investiga y nun atopa nada (esto ye creíble); pero depués ún de los miembros de l’asociación-secreta-rapta-turistes ataca a una de les dos pareyes que queden a base d’espadazos delantre de tol mundu nun barcu (mui creyible). Cuando yá toos ven que tán morriendo y que van a por ellos (primero a pol indocumentáu, depués a pola pareya esta) en cuenta de marchar o quedar nel hotel muertu mieu – que sedría lo que fadríemos el 99% de xente – deciden montar la so propia investigación PELA NUECHE peles cais ENANES de Venecia y AL MARXE de la policía. Too mui lóxico, porque ta claro que cuando un asesín mató/secuestró a un collaciu y mató a otru, lo que tu vas facer ye quedate ehí “investigando”.
La única persona con xacíu ye’l noviu d’una de les viaxeres del cruceru, que vien esmolecíu a Venecia y en viendo’l percal, diz-y que qué coño fai ehí, que marche pa casa, que ta morriendo xente. A ella nun se-y ocurre otra cosa más que dexalu y siguir investigando cola policía. Al final resulta que l’asociación-secreta-rapta-turistes yera una especie d’Anonymous con internet y la de dios y los dos cabezaleros d’ella suicídense depués de secuestrar a unos turistes cola so organización terrorista. Nun sabemos entá por qué se suiciden depués d’asustar a los turistes, que ye lo que queríen… Too mui coherente…. …si te das un golpe na cabeza.
La película faise llarga y dacuando da la risa de lo incoherente que ye (esto ye dalgo bono, porque si nun diere risa, fadríase insoportable).
