Una moza con talentu apuerta a Hollywood, y ellí un direutor nomáu amuesa interés pol so curtiumetraxe y úfrese como mentor. La cosa paez dir bien, roblen un contratu pol que fadrán una película basada nel curtiu, y ella va ser la direutora… Bono, asina yeren les coses fasta qu’él tienta de reblincala y ella, ablucada, esbárdialu. Pero, cuando’l puntu-y roba la película, ella fadrá too a lo que seya quien pa recuperala… mesmamente pidir ayuda a una bruxa que promete agüeyalu, a cambéu d’un pagu del que la ñatura nun perqueda clara.
Esti ye l’entamu de Brand New Cherry Flavor, la serie nueva de Netflix que nun va dexate indiferente. Pueque te paeza un espantu grandón, nun digo que non, o pueque te paeza una maraviya como al qu’equí escribe. Lo que duldo muncho ye que nun te dea más.
Al cargu tán el creador y una de les guionistes de Channel Zero, y vese que yá tán avezaos no de facer series de mieu y son a movese a los sos deleres nesta. Por embargu, anque nun pierden el so toque personal, de xuru que si faen un trabayu escelente y penriba del de la otra serie ye por dir arriques de xigantes. Nun tienten d’escondelo, les influyencies son tan bultables que nun paez casualidá que la hestoria tea asitiada a entamos de los noventa. La sicodelia y l’usu de les colores de David Lynch tán ehí, per toles partes, anque por suerte nun lleguen a tomar l’argumentu y facelu incomprensible. Tamién hai dellos elementos de body horror que paecen sacaos d’una película de David Cronenberg, o quiciabes d’una de Clive Barker, y per aciu de medios clásicos como’l látex y los animatronics. Masque l’estilu de narración ye’l d’una serie moderna, andando ente medies d’una película pa ver d’una posa y una serie pa ver a cachos, y lo que cunten nun resulta nada serondiego por ser un tema tan d’actualidá como les denuncies del #MeToo.
Ah, bono, y salen gatos, zombis, pantasmes, trepanamientos, canibalismu, sexu monstruosu, un plizcu d’humor negro y unes actrices que calquen los sos papeles… Tolo preciso pa pasar un bon ratu a lo llargo d’ocho episodios. Lo que ye una llaceria ye que la definan como “miniserie”, porque eso significa que cuasique nun vamos tener más temporaes. Sicasí, habrá que tar bien atentu a lo próximo que saquen los creadores, arriendes de dar gracies a la canal porque, dacuando, arriésgase con productos que nun tán fechos p’algamar el Top 10, sinón pa satisfacer gustos un pocoñín estrambólicos.
