El venticuatro de marzu supimos que Marvel Studios despidía a la so presidenta executiva, Victoria Alonos, anque nun nos llegó mui claro’l porqué. “Por violar la política de la compaña”, dixeron a cencielles, y los representantes d’ella respondieron que la decisión diba tener “consecuencies series”. Yá había problemes desque Alonso criticó a Disney nos GLAAD, acusándolos d’apoyar económicamente la campaña de Florida Don’t Say Gay, y pidiendo por ello la cabeza de Bob Chapek (primer executivu de Disney al que cesaron en xineru). Pero, agora, filtraciones dende les coraes de Disney afirmen que’l despidu se debió tamién a la so negativa d’emborronar una bandera l’arcu la vieya que salía nel fondu d’una escena de Ant-Man & The Wasp: Quantumania. L’envís d’aición tala sedría la so estrena en países con lleis anti-LGBT, y, polo que se ve, al refugalo ella mandáron-ylo a otra persona. Y ye qu’anque Marvel dacuando ñégase a facer esti tipu de cambios, tamién hai otres vegaes nes qu’encueye énte les esixencies pa estrenar les películes en dellos países, como foi’l casu de Black Panther: Wakanda Forever pa sacala en Kuwait.

Por embargu, hai otres voces que defenden otra teoría, y sedría namás el seriu recorte de presupuestu que ta llevando Disney no que ye Marvel Studios (les razones contámosvosles apocayá equí). Esta teoría vese reforciada agora qu’acaben de despidir tamién a Ike Perlmutter, presidente de Marvel Entertainment y el promotor en 2009 de la venta d’esta a Disney. Esti despidu, y según dellos el d’Alonso, fai parte d’un plan pa echar nada menos que siete mil trabayadores, y que convertiría Marvel nuna parte enforma más integrada y dependiente del imperiu l’entretenimientu.

Leave a Reply

La to direición de corréu nun va espublizase. Los campos riquíos márquense con *