El mou construcción del Sims ye, probablemente, el xenerador de mundos que más s’emplega de toos. Hasta’l puntu de que s’emplega más que’l propiu xuegu.

Videoxuegos hailos de munchos temes y dinámiques estremaes: FPS, RPG, d’estratexa, simuladores… cada xéneru respuende a una serie de necesidaes y de preferencies que faen qu’unos seyan más afayadizos qu’otros según pa quién. Nesti artículu, y viendo l’alderque qu’hebo en redes sociales y les demandes nesti sen, dexamos de llau’l xéneru y centrámonos namás nuna cosa: En que tengan un xenerador de mundos.

¿Qué ye un xenerador de mundos?

Normalmente los videoxuegos tienen unos niveles nos que se desendolca l’aición. Si son xuegos d’estratexa, el nivel nel que se desendolca ye un mapa militar (de la Segunda Guerra Mundial, de les Guerres Púniques o de lo que seya), si son de tiros, esti escenariu va ser un edificiu, un monte o una ciudá, etc. Los xuegos con xenerador de mundos déxennos ser nós los que creemos estos escenarios. Ye dicir, ye la manera de poder non solo xugar al videoxuegu y esfrutar de les dinámiques y de la xugabilidá; sinón tamién configurar l’escenariu nel que queremos xugar.

D’esti mou, podríemos crear un “nivel” o “mundu” nun videoxuegu faciendo l’escenariu d’una nueva guerra o escoyendo la configuración d’un nuevu edificiu. Hai bien de videoxuegos que mos permiten esplorar la nuesa creatividá d’esta manera. Por eso, nesti artículu apurrímosvos una llista non completa (nenguna llista de videoxuegos ta completa) d’aquéllos que permitan esta funcionalidá.

The Sims

Hai un mitu que diz que The Sims ye un xuegu pa xugar a llevar les vides de los miembros d’una familia, facer que seyan amigos, enemigos, y crear con ellos hestories de lo más diverso. Hai quien diz que nesti videoxuegu, lo principal ye acompañar a los personaxes a lo llargo del so desendolcu profesional nes sos aspiraciones. Obviamente, esto ye un mitu, porque los más de los xugadores de The Sims direutamente y práuticamente inoren estes prestaciones (que son, supónse, el centru del videoxuegu) y acaben dedicaos a lo que ye’l xenerador de “mundos”. Nesti casu, el xenerador nun ye de mundos sinón, más bien, de cases y de barrios. Y ye que The Sims ye quiciabes la ferramienta non-profesional más completa pa crear cases, castiellos, mansiones, apartamentos… por eso ye ún de los xuegos nos que’l “xenerador de mundos” da pa más que’l propiu xuegu.

Si vos interesa The Sims, podéis atopar la guía que fixo Aymara González equí pa Refuelgu.

Civilization:

El Civilization ye ún de los videoxuegos de 4X – 4S n’asturianu -(Esplorar, Espandise, Esplotar, Esterminar) más interesantes qu’hai, y que permite, amás, el poder ganase d’un mou non militar (per aciu de la victoria cultural, diplomática o económica. Esti xuegu dispón d’un sistema que permite a los xugadores crear nuevos mapes que puen tener formes y distribuciones de recursos basaes en llugares concretos (por exemplu, pue facese un mapa del Caribe pa facer nél una partida centrada na piratería) o en llugares imaxinarios (ye posible, si se tien paciencia, recrear la Tierra Media o otru universu de fantasía)

Age of Empires

Nun hai namás un Age of Empires, sinón bien d’ellos. L’I, el II, el III, la remasterización del II o les munches espansiones. Con too, los más d’ellos tienen disponibles la función de crear mapes distintos. Amás, en dellos como’l Age of Empires II esta funcionalidá refuérzase non solo cola opción de crear un mapa nel que xugar sinón, tamién, una serie d’elementos que’l xuegu llamó “desencadenadores” y que permiten que, en llegando coles unidaes a un ciertu llugar pasen coses. Esto fai que seya posible crear non solo escenarios y mapes, sinón tamién campañes completes y hestories. Eso sí, requier de bien de tiempu.

Lego

Otros videoxuegos nos que l’emplegu del creador de mundos ye bien importante son los videoxuegos de Lego. Nellos, como ye obvio, ún de los aspeutos que más importancia tien ye’l de poder crear. La creación, nellos, nun va namás de crear llugares, sinón vehículos y personaxes. Eso sí, les llendes son les de les pieces de Lego. Si hai pieces de Lego pa facelo mui probablemente va poder facese nel xuegu.

Far Cry

En xeneral los editores de mundos o level editors suelen tar venceyaos a xuegos de creación como’l Lego o’l Sims, o a xuegos d’estratexa nos que ye más fácil crear niveles. Nun ye’l casu de xuegos de 3D o shooters. Sicasí, la esceición, o una de les poques qu’hai, atopámosla nel Far Cry. La saga Far Cry cuenta con editores afayadizos pa que cualquier persona, ensin necesidá d’unos conocimientos mui téunicos pueda facer un nivel nesti videoxuegu

Munchos más

La llista de videoxuegos con level editor ye muncho más grande anque, desgraciadamente y polo comlexos que tán siendo agora, cada vez heba menos. De toes maneres, hai unes bones comunidaes de Mod pa los principales videoxuegos. L’interés d’estes ferramientes ye llevar más alantre la creatividá y algamar un nivel d’apropiación del videoxuegu que nun podemos consiguir per sigo mesmu.

Leave a Reply

La to direición de corréu nun va espublizase. Los campos riquíos márquense con *