El Nadal suel ser esi momentu del añu en que más villancicos se sienten (quiciabes l’únicu) y dacuando siéntense tan “en bucle” qu’acaben fediéndote. ¿Y si probamos dalgo distinto? L’Equipu de Refuelgu foi a la gueta de qué alternatives friquis había a los típicos cantares navidiegos y atopó una montonera de propuestes ehí nes redes. Entamamos col top de cantares navidiegos friquis:
TOP 6: Los Power Rangers dedíquente Feliz Navidá
Nun ye pa tanto, porque nun creen música nuevo. Pero, oi, ¿Y ver a los Power Rangers con Alpha 5 y Zordon cantando’l Merry Christmas? D’eso va esti vidéu.
TOP 5: Star Wars: Navidá instrumental
Mezse un tema navidiegu col clásicu tema de Star Wars. El resultáu ye prestosu pero nada al nivel de Cthulhu. Importante trabayu dende lo musical al que-y falta, na nuesa opinión, una correllación vocal… pero ye difícil d’atopar visto’l fechu que la mayoría de cantares de Star Wars nun tienen lletra.
TOP 4: World of Warcraft: Cantar navidiegu
Pos ye esautamente lo que pon nel títulu; un cantar navidiegu sobre’l mundu de World of Warcraft qu’inclui una montonera referencies al que probablemente seya’l videoxuegu online más famosu de tolos tiempos. Igual nun ye lo meyor musicalmente, pero graciso ye.
TOP 3: All I Want for Christmas is… D&D?
Otru remake d’All I want for Christmas pero con D&D. Una parodia (de les munches qu’hai) del clásicu cantar navidiegu anglófonu.
TOP 2: Cantares navidiegos con un toque steampunk
Un remake bien guapu y con toques steampunk a los cantares ingleses navidiegos de siempre. Prestoso d’oyer… dientro de tolo prestoso que pue ser un cantar de Nadal. Claro.
TOP 1: Lovecraft, Cthulhu y la navidá
Nun ye una, nin son dos, nin tampoco trés. Hai una montonera de cantares navidiegos basaos en temátiques lovecraftesques o Cthluhuesques como Have Yourself a Scary Little Sostice Lyrics, Tentacles, Silent Night, Blasphemous Night o Oh Cthulhu. Una montonera d’elles coles qu’en cuenta d’adorar a Xesucristo podemos facer lo propio col señor Cthulhu que duerme no fondero del mar… ¿a fin de cuentes, nun tamos toos esperando’l so advenimientu final?
