En 1987 llegó a les sales de máquines Contra, y tuvo tantu ésitu qu’al añu siguiente yá había versión pa NES y una segunda parte, Super Contra. Bono, pola censura que se llevaba naquella nos videoxuegos, n’Europa y Australia llamáronse Probotector y Probotector 2 y cambiaron los estraterrestres por robós, pero eso ye otra hestoria y a la llarga acabó imponiéndose’l nome verdaderu.
El casu ye que Contra ye un clásicu, un referente nos videoxuegos, y como talu nun puen pasar munchos años ensin sacar otru. L’últimu, Contra: Rogue Corps, salió en 2019, conque yá yera hora de tener ún nuevu. Esti ye Contra: Operation Galuga, y va salir pronto (nun hai fecha confirmada) pa PC, PlayStation, Xbox y Nintendo Switch (de fechu, sabémoslo pol recién Nintendo Direct, del que los próximos díes vamos contavos más noticies).
¿Y de qué va Contra? Bono, ye un run and gun o, lo que ye lo mesmo, ta ente medies d’un “matamarcianos” y un beat’em up, pos nél manexamos (ta pensao pa dos xugadores) los comandos d’élite con unos pistolones tremendos Bill Rizer y Lance Bean (cómo non, ún roxu y otru morenu, pa que nun nos confundamos de personaxe), qu’han enfrentase a estraterrestres. Cosa que ta tan na llinia de Predator que sorpriende un poco que’l videoxuegu orixinal saliera unos meses primero. Pa ello, claro, vamos poder dir recoyendo municiones especiales, coles que les armes van garrando habilidaes distintes. L’argumentu nestes coses ye lo de menos, pero nesta entrega alcontrámonos con qu’un grupu terrorista toma la isla de Galuga, cerca de Nueva Zelanda, y entámala bien gorda.
Dexámosvos l’avance de la entrega nueva calcando equí.
