El famosu marsupial perevolucionáu que foi la estrella de les plataformes de PlayStation, llegando a identificase cola plataforma tanto como Mario coles de Nintendo o Sonic coles de Sega, vuelve a les consoles de manes del desendolcador Toys for Bob, y yá en nada, esti venti de xunu. Failo, amás tanto pa PlayStation (4 y 5) como pa Xbox (One, Series X y Series S), y con un tipu de xuegu que busca probar dalgo nuevo colos personaxes de siempre de la franquicia.
Tamos énte un multixugador de llucha cuatro contra cuatro que promete unes dinámiques dafechu nueves. L’envís ye pañar más frutes que los contrarios, pero pa ello tamién pues enfrentate a ellos direutamente, evitando que garren más o robándo-yos les que yá tienen. Ye un xuegu de partíes curties y que busca sobre manera la diversión, dando a cada personaxe unes habilidaes úniques coles qu’idear una estratexa.
Yá hai quien pue tar esfrutando de la versión beta, pa la qu’abrieron un plazu bien curtiu, d’unos pocos díes y del qu’avisaron con pocu tiempu. Foi con esti vidéu, anque tamién tán saliendo otros a esgaya, como una presentación cinemática (equí) o los gameplays de los xugadores que tuvieron sollertes, ente los que destacamos esti pero que yá hai a cientos.
Crash Bandicoot ye una franquicia de xuegos, sobre manera de plataformes, que tien venío más de cincuenta millones de copies en tol mundu desque sacaron el so primer xuegu, en 1996.
