Los personaxes de la clásica serie de dibuxos de Dungeons and Dragons, basada nel xuegu de rol más conocíu del mundu y estrenada allá en 1983, vuelve agora en forma de cómic, a l’avía de la película que van estrenar en marzu.
La serie trataba sobre unos rapazos que, en xubiendo a una montaña rusa, altravesaben un portal dimensional que los llevaba a un mundu de fantasía. Ellí, el Dungeon Master dába-yos armes máxiques que los convertíen en personaxes arquetípicos como los del xuegu: un arcu en guarda, un escudu en caballeru, una piértiga n’acróbata, un gorru en magu, una capa en lladrona y un garrote en bárbaru. Perdíos nesi mundu, habíen enfrentase a abondes amenaces ente les que destacaba un magu malváu, Venger.
La serie curtia de cómic, de cuatro númberos, traila IDW, como ye vezu cola franquicia. Guionícenla David M. Booher (All-New Firefly) y Sam Maggs (My Little Pony/Transformers), y dibúxala George Kambadais (Buckhead). Nella, l’equipu orixinal de rapazos ha enfrentase de nueves a Venger, y tamién a la posibilidá, y al dilema, de si tornar o non al mundu real.
Dexámosvos darréu coles portaes alternatives yá mostraes: