Nel añu 2000 estrenaron la primer película d’una de les sagues d’horror más esitoses d’esti sieglu, y que nuna década (bono, pa ser precisos, once años) tuvo nada menos que cinco entregues. Esta foi Final Destination, y lo más peculiar que tenía yera que l’asesín yera la mesma Muerte. ¿Cómo ye, ho? Pos que la premisa yera siempre la mesma: un mocín o una mocina tenía una visión que-y dicía que delles persones (ente les que s’incluyía) diben morrer nun accidente espantible, y al salvase y salvar a los demás frustraba los planes de la Muerte. Esta, anque nunca nun sal como personaxe, frústrase porque los planes-y salgan mal, y produz una riestra d’accidentes que solos puen ser inofensivos, pero que xuntos provoquen muertes terribles coles que va quitándose del mediu a tolos que se-y escaparon.
Esti plantegamientu tan orixinal, d’un slasher ensin asesín, permitió repetir la fórmula ensin dar cuasi signos d’agotamientu, y de fechu tuvieron a puntu de facer una sesta parte (ambientada na Edá Media, dicíen los rumores) que llamentablemente quedó pa prau. Sicasí, agora anuncien que taben yá a puntu de ponese a rodar un reboot cuando escomenzó la fuelga d’actores, y que van ponese con él en cuantes qu’esta acabe. Sicasí, hai mui poca información al respective, cuasi lo único asoleyao ye que nel repartu s’alcuentra Tony Todd (el Candyman orixinal) actor que yá tien fecho cameos nes entregues anteriores como un misteriosu forense que sabe muncho, quiciabes demasiao, sobre la manera na que la Muerte arregla les coses.
Hai discusiones sobre si la película supón un iniciu nuevu o ye una continuación de les anteriores… pero, dau l’índiz de muerte por película, que fai mui poco habitual que dalgún personaxe repita, ¿qué más da?
