¡Eso ye! Vuelve Adventure Time… anque hai que dicir (ye verdá que de mano pue paecer desconcertante) que los que de momentu nun vuelven son los sos protagonistes, Finn y Jake. Y ye que la serie nueva que ta preparando HBO Max va centrase en Fionna y Cake, les sos versiones d’una dimensión paralela que, por si nun vos alcordáis, presentaron na tercer temporada de la serie orixinal como un fanfic obra del Rei Xelu. Tamién pudimos veles nuna serie curtia de cómics que protagonizaron, allá pel yá llonxanu 2013.
Y nun ye que se vayan a centrar en presentanos el so universu, bastante asemeyáu al orixinal, sinón que los personaxes, según cuenten na sinopsis, “van embarcase nuna aventura de saltos pel multiversu y nun viaxe d’autodescubrimientu. Too ello mientres un antagonista nuevu y poderosu, decidíu a sigui-yos la pista y borrales de la esistencia, achisba nes solombres”. Asina, la serie adiéntrase na temática tan de moda agora de los mundos paralelos (con series como Rick and Morty o What If…?, les últimes películes de Doctor Strange, Spider-Man y Flash o la premiada Everything Everywhere All at Once) y d’esta manera tamién nos dexen la puerta abierta pa que volvamos a ver a Finn y Jake… o dalguna otra versión alternativa d’ellos.
Sobre la calidá de la serie, y si caltién l’espíritu de la orixinal, ye dalgo de lo que nun tenemos de preocupanos demasiao, pos el guionista y productor de la serie orixinal, Adam Muto, va tar al mandu del proyeutu. Y tamién prometen cantares tan recordables como los de la serie orixinal, teniendo trabayao nellos Rebecca Sugar (Steven Universe) y Patrick McHale (Over the Garden Wall)
La primer temporada, que s’estrena yá’l trenta y ún d’agostu, va constar de diez episodios de media hora, y dexámosvos l’avance calcando equí.
