Ente 2002 y 2009 esfrutamos d’ún de los detectives más prestosos de la historia de la televisión. Yera ún d’esos a los que fai especial el so defectu, nesti casu un TOC (trestornu obsesivu compulsivu) que yera tremendu… Sobre manera tres la muerte de la muyer, pos enantes podía sobrellevalu y trabayar de policía. Pero, tres esti socesu tráxicu, empeora tanto que se ve obligáu a dexar l’oficiu, masque los sos compañeros siguen pidiéndo-y ayuda polo xenial que ye investigando.
Años depués aprovecharon esta característica suya, de fechu, pa trayénoslu de vuelta col andanciu, cuando salió un curtiu, a mou de chancia y didáctica, nel que l’actor Tony Shalhoub volvía a encarnar a Adrian Monk pa mostranos cómo taba pasando él el confinamientu (por si nun lu vistis, dexámosvoslu calcando equí).
Pos el casu si yereis fans del personaxe (y si non, yá tais buscando la serie) tais de norabona, yá que tenemos unes noticies estupendes pa vosotros. Y ye qu’agora va volver otra vegada pero nesta en serio, pa una película qu’estrena nos Estaos Uníos la canal de streaming Peacock l’ocho d’avientu (tovía nun sabemos ónde va salir n’España). Amás de que nun lo fai él solu, sinón que tol repartu principal lu acompaña.
En Mr. Monk’s Last Case: A Monk Movie, que ye dalgo asina como un capítulu especial d’hora y media, Monk ha resolver un casu qu’envuelve a la so fía adoptiva, y el director Randy Zisk diz que quier falar tamién de cómo cambió’l mundu desque acabó la serie, y contanos una hestoria “potente, emotiva, divertida, conmovedora y que fale de la condición humana”.
