La serie Sandman de Netflix tien puesto de moda’l personaxe creáu por Neil Gaiman, Sam Kieth y mike Dringenberg (anque, como suel pasar nestes coses, la xente namás queda col nome del guionista), del que per otra parte la so serie de cómics ye una de les más conocíes, allabaes y emponderaes de les feches nunca pa Vertigo (el sellu que tenía p’adultos DC Comics). El casu ye que, anque la segunda temporada se ta faciendo esperar, en DC aprovechen el tirón y lleven un tiempu sacando toa una llinia de cómics, Sandman Universe, qu’esplora los diferentes personaxes y la mitoloxía de la serie orixinal: Nightmare Country, con Corinthian como protagonista, y crossovers con Hellblazer y con Locke & Key son solo dellos exemplos. Pero la cosa debe tar teniendo bastante ésitu, porque agora nos traen una serie nueva de The Sandman… anque nun ye’l Sandman que podéis tar suponiendo.
Y ye que’l Sandman de Vertigo ye’l tercer personaxe de DC que lleva esi nome, siendo’l primeru ún de los personaxes más antiguos de la compaña. Wesley Dodds, creáu por Gardner Fox (el mesmu que formó la Lliga de la Xusticia) y Allen Bert Christman, tuvo la so primer apaición en 1939, cuando los superhéroes yeren tovía escasos y se llevaben más los “homes misteriosos”. Asina, yera un personaxe ensin mayes nin poderes, namás un puntu entraxáu y con mázcara que prendía a los malos con una pistola de gas adormecedoro. Nun tardó muncho n’unise a la Sociedá de la Xusticia (la versión de los años cuarenta de la Lliga) y poner unes mayes paxareres, pero ye esa imaxe orixinal y clásica la que quedaría nel imaxinariu y a la que, munchos años depués, volvería.
Y asina, gracies al conceptu de “legáu” que se lleva bastante en DC, pol que los personaxes nuevos suelen garrar el nome d’antiguos, agora alcontrámonos col revilvamientu d’esti héroe, nuna serie que lu trai, pelo menos nun principiu, nuna hestoria ambientada nos sos años mozos. Los autores son el guionista Robert Venditti (The Surrogates, X-O Manowar) y el peculiar Riley Rossmo como dibuxante (Martian Manhunter, Harley Quinn), y, polo que podemos ver nes páxines promocionales, paecen facer suya la idea de Gaiman de que, de dalguna manera, Dodds ta influyíu por Morféu y tien suaños premonitorios.
La serie estrénase yá nos Estaos Uníos (el diez d’ochobre) y dexámosvos darréu les imáxenes de les distintes portaes y les primeres páxines, que como suel ser vezu espublícense n’Internet pa ponenos los dientes llargos.
