Desque un tal Erick Knusden (Victor Surge nes redes) retocó una semeya pa qu’apaeciera nella un monstruo llargaritu, con traxe y ensin rostru, l’ésitu del “Slender Man” ta siendo tremendu. Basándose n’hestories d’horror como les de Stephen King, H.P. Lovecraft o WIlliam S. Burroughs, l’usuariu dio aspeutu a esta creatura tan tenebrosa cola que debió consiguir tocar dalgo fondo del ser humanu, porque s’espardió peles redes como nenguna otra cosa. Los creepypasta (hestories de mieu nes redes que se presenten como reales) diéronnos otros cuantos monstruos nesti folclor posmodernu que ta surdiendo, como puen ser Momo o l’Ayuwoki (basáu en Michael Jackson), pero nengún ta produciendo tantes obres derivaes como Slender Man.
Una creatura bultablemente inhumana, pero que magar ello paez tratar de pasar inalvertida vistiéndose como un home y faciendo pasar los raxos por brazos, y al que mueven unes intenciones dafechu desconocíes. Tien, amás, el poder de borrar mentes, faciendo olvidar la so presencia a quien lu ve. Y magar que como n’Internet too se guarda, tenemos rexistrao quién lu ideó, másque cada usuariu va dándo-y un matiz nuevu y xuntos van conformando y arriqueciendo la lleenda. Dende 2009 hai delles webseries sobre’l monstruu, poco depués empezaron les películes, los videoxuegos y hasta unos personaxes estraterrestres basaos nél na serie Doctor Who. La situación toma un tinte muncho más siniestru cuando, en 2014, dos neñes maten a otra col envís de “convertise n’acólites de Slender Man”, y otra quema so casa cola familia dientro tres ver dellos videos sobre’l monstruu.
Ye evidente que Slender Man vieno pa quedar ente estos nuevos cibermitos. Ún de los videoxuegos más populares, si non el que más, ye Slender: The Arrival (2013), y agora les sos cuentes en redes anuncien una cuenta atrás qu’acaba’l ventiocho de xunetu. Según se ruxe, l’anunciu tendría que ver con un remake o una continuación del videoxuegu. Dexámosvos l’avance calcando equí esperando que seya namás eso, y non que Slender Man traiga collacios pa escomenzar la invasión.
