En 1988 estrenóse una película que, magar el fracasu nos cines, colos años convirtióse nun cásicu homenaxáu en milenta sitios, y que s’analiza davezu como una hestoria con un altu conteníu políticu escontra’l consumismu y, en xeneral, una crítica al capitalismu en sí mesmu. El protagonista, John Nada, ye un méndigu que por casualidá alcuentra unes gafes de sol coles que pue ver cómo ye’l mundu en verdá: los estraterrestres tán ente nosotros, y de fechu son los que nos gobiernen. Amás, los productos que compramos tienen mensaxes soliminares que nos afalen a trabayar y reproducinos, el dineru pon “soi’l to Dios”… la nuesa sociedá ta basada nuna mentira, y ye que somos esclavos d’una élite ensin sabelo.
John Carpenter tráxonos esta hestoria na que, como apunta’l filósofu Slavoj Žižek (podéis ver l’analís equí, anque con sotítulos n’asturianu), lo más llamadero ye que nun tenemos unes gafes que quitanos, sinón que ye poneles, garrar unes ferramientes coles que ver el mundu, lo que nos fai ver cómo ye en verdá.
Pero, dexándonos de coses metafísiques, el casu ye que tán preparando una versión nueva (tovía nun sabemos si modernización o continuación), y de momentu sabemos que va tar a la dirección Matt Reeves (The Batman, Let Me In, Cloverfield) y Andy Serkis (la triloxía nueva de The Planet of the Apes, Black Panther y tamién The Batman como Alfred) va tener un papel importante, anque tovía nun ta confirmao que seya’l protagonista. They Live: The Conspiracy Unveiled, que ye como va llamase esta versión nueva, ta dende va tiempu ente manes de los productores, pero ye agora cuando por fin empieza a tomar forma y tenemos noticies sobre dirección y repartu. En cuantes sepamos más, que paez que va ser pronto, por supuestu vamos contávoslo.
Si queréis facer boca cola pinta que tenía l’antigua, y tampoco ye que vos llamen muncho les disquisiciones de Žižek, dexámosvos equí l’avance.
