Va nada contábamosvos que tán preparando una serie d’animación basada en Stranger Things, del estilu de los dibuxos de los sábados pela mañana, que sirviría como pondera d’esta y esplotación de la franquicia agora que la serie madre ta pa terminar (podéis ver la noticia calcando equí).
El casu ye que la saga tien ésitu talu que los productos derivaos nun queden solo pa la pantalla, y tienen salío yá unes cuantes noveles y historietes qu’amplien l’universu, y hasta una baraxa de taró. Agora, gracies a estos productos, vamos poder esfrutar de la vuelta del que se convirtió de xuru nel personaxe más queríu de la cuarta temporada, el tripitidor, traficante, fan de Metallica y xugador de rol Eddie Munson.
La novela Flight of Icarus, escrita por Caitlin Schneiderhan (guionista de la serie) y editada por Penguin Random House, va contanos una aventura del personaxe asocedida poco enantes de la so apaición na serie, na que va tratar de consiguir perres pa grabar una maqueta. Pa ello, va necesitar l’ayuda de so pá, que como vamos ver nun ye de fiar. Nun hai fecha confirmada, pero va salir esti mesmu añu.
El personaxe d’Eddie, interpretáu por Joseph Quinn, ganóse al públicu de la serie namás apaecer, pol sol calter escéntricu tanto como pol gran corazón. Representó en gran manera’l mieu que producíen na dómina la música heavy y los xuegos de rol, pos cuando apaez un cadabre en so casa conviértese nel enemigu públicu númberu ún y, pronto, rúxese qu’encabeza una secta satánica.
Presta pero va quedar raro si esta historia nun empata cola parte sobrenatural de Stranger Things.