Van yá cuasi dos años desque estrenaron en Netflix la serie Sweet Tooth, la que taba basada nun cómic de Jeff Lemire pal sellu Vertigo de DC Comics (la llinia que tenía de cómics p’adultos, agora sustituyida por Black Label). Y anque la cosa s’eternizaba tanto que yá non pocos daben la serie por perdida, como tantes otres de la canal coles qu’hubo polémica apocayá, acaben d’anunciar que la segunda temporada va salir yá en nada, exautamente’l ventisiete d’abril. ¡Cuasi dos años dempués!
L’adautación a serie d’aición real fai bastantes cambios al cómic orixinal (contrastámoslos amunchayá nesti articulín), amenorgando los componentes más siniestros que podríen desagradar a un públicu xeneral, sobre manera por tener al empar un neñu como protagonista. Abulta, por embargu, que foi una decisión acertada, pos l’ésitu ente la crítica y el públicu foi abondu, y esti anunciu ta recibiéndose con allegría en redes.
La historia, por si nun sabéis de qué va, trata d’un mundu nel que cuasi la totalidá de la humanidá morrió pola mor d’un andanciu, y al empar d’afeutar esti empezaron a nacer guaḥes con atributos animales, a los que se culpó del mal. Años dempués, nuna ambientación posapocalíptica, un neñu-venáu (de cuernos, non de que tea alloriáu) ha salir de la viesca na que se crió y descubrir cuálu ye’l so orixe. Y, por supuestu, el mundu ye perpeligrosu, sobre manera pa los neños como él, y atopa abondos peligros pel camín.
Yá compartieron delles imáxenes de la temporada nueva, y dexámosvos unes cuantes darréu:
