Buffy the Vampire Slayer foi una d’eses series que marcó a millones de fans en tol mundu, y estos recuérdenla entá con ciñu. El so entemez d’aición, horror, drama, comedia y romance adolescente tuvo un ésitu tremendu, y cuando acabó dexó como legáu la pondera Angel, una montonera de cómics y el deséu de munchos de qu’un día volviera.
Bono, pos Buffy en sí mesma, la que ye Buffy, nun vuelve (Sarah Michelle Gellar tien dicho que yá acabó col personaxe y nun quier volver a saber de nengún proyeutu), pero sí otros munchos actores del elencu: James Masters (Spike), Charisma Carpenter (Cordelia), Anthonu Head (Giles), Juliet Landau (Drusilla), Emma Caulfield (Anya), Amber Benson (Tara), Danny Strong (Jonathan) y James Charles Leary (Clem, el demoñu con pelleyu de más y les oreyes cayíes) tán yá confirmaos. Y, amás, vamos tener una Cazadora nueva a la que va interpretar Laya DeLeon Hayes, una actriz de voz pa dibuxos y videoxuegos. Lo malo ye qu’a nengún d’ellos nun vamos velos en pantalla, porque, como dalgunos yá podéis suponer pola incorporación nueva, pa lo que vuelven ye pa un audiodrama de la plataforma Audible… lo que sedría, pa entendenos, un serial radiofónicu como los de tola vida, pero sacáu en formatu podcast. Slayers: A Buffyverse Story va ambientase diez años depués del final de la serie, y va contar, na primer y de momentu única temporada anunciada, con esti argumentu:
“Dende aquella, Spike foi y ta d’incógnitu en Los Ángeles, convenciendo a les fuercies de la escuridá de que volvió al mal camín. Cuando la tapadera se ve comprometida por Indira Nunnally, de dieciséis años, Spike alcuéntrase de nueves nel deber de cuidar d’una Cazadora guaḥa. Mientres intenta atopar al vixilante de la so nueva protexida ansiosa, los sos caminos choquen col d’una Cazadora veterana, d’una realidá paralela onde Buffy Summers nunca esistió… una realidá onde Cordelia Chase ye la la única Cazadora. Ella precisa l’ayuda de Spike escontra un gran villanu clásicu qu’apavoria’l so mundu… el so vieyu amor, Drusilla”.
El serial estrénase’l doce d’ochobre.
