Ta de moda la señardá, y demostrólo va poco la película The Flash usando como ganchu principal de la película la vuelta de Michael Keaton como Batman. Y ye que pa los que somos más paisanos él foi’l Batman verdaderu (con perdón d’Adam West) y lo mesmo pasa col Superman de Christopher Reeve (al que tamién pudimos ver un momentín na película, anque mui pocu tiempu y evidentemente fechu con CGI).
La verdá qu’estos “cameos” nun son raros nos cómics, que l’adautación acabe dando la vuelta y volviendo al mediu. Hai historietes mui entreteníes qu’aprovecharon los cambios producíos nesi viaxe de dir y volver, como son casu The Batman Adventures (ambientada nel mundu de la serie animada de los noventa) o Batman ’66 (nel de la serie del yá mentáu Adam West).
En 2021, quiciabes nun principiu cola idea de facer sinerxa cola película del velocista escarlata (recordemos que sufrió una cantidá tremenda de retrasos), DC sorprendiónos con dos series curties que facíen un poco lo mesmo. Una, Batman ’89, facía de tercer parte de la saga de Tim Burton, y otra, Superman ’78, contábanos una hestoria inédita del Superman de Richard Donner. Agora, DC anuncia de nuevo una vuelta a estos universos, y failo con dos hestories que resulten bien llamaderes.
Batman ’89: Echoes (de Sam Hamm y Joe Quiñones) va enfrentar al Caballeru Escuru con unes versiones nueves de Scarecrow y Harley Quinn. La hestoria pue paecer una más, pero tien una anéudota mui especial darrera: Tres les dos películes de Burton vinieron les dos de Schumacher, y de nun ser poles crítiques que tuvieron estes saliera otra quinta, Batman Triumphant. Nesta, sabemos pola filtriación del guión, esos yeren xusto los enemigos a los que diba enfrentase. Y hasta hai coses del repartu; esa Harley de la portada que vos ponemos debaxo… ¿nun tien un aire a Madonna o quiciabes a Courtney Love, les candidates al papel (y con una sorrisa que recuerda demasiao a la de Jack Nicholson)? Yá namás dicivos que tamién había planes pa una sesta película, y si tán manexando los guiones orixinales ye mui probable qu’al final d’esti cómic vuelva un personaxe a la saga de manera sorpresiva.
Per otru llau, en Superman ’78: The Metal Curtain (de Robert Venditti y Gavin Guidry) van contanos otra hestoria inédita, pero mui venceyada a la época na que trescurríen les películes. Polo que se ve, ente los restos de Krypton tamién hubo dalgún cachu que cayó na Unión Soviética, y los rusos van usala pa intentar crear un héroe roxu al altor del Home d’Aceru: Metallo.
Los primeros númberos de dambes dos series salen nos EE.UU. en payares, colo qu’igual tenemos qu’esperar un añín pa ver los tomos recopilatorios en llibreries de pequí.
