Ún de los elementos más llamaderos de la pasada AsturCon foi la organización de les speed dates, “cites” ente pretendientes a autores y les editoriales participantes nes que los primeros presentaben y “vendíen” los sos manuscritos. L’ésitu d’estes ye bultable, yá que, según la organización, dos de los autores qu’esti añu son ponentes nes meses d’alderique conocieron per esti mediu les editoriales que-yos publicaron la obra pola que vienen.
Asina, el plazu p’apuntase a les speed dates ta abiertu, yá cualquiera pue apuntase na páxina web de l’AsturCon, onde se pregunta pol xéneru de la obra, la llingua y les espectatives del autor, pa d’esta manera asigna-y les editoriales que tean interesaes n’escuchalu.
Estes, per otru llau, son más qu’antaño, pos nesta segunda AsturCon participen Pez de Plata, Quanta Media, Orpheus Ediciones Clandestinas, Duermevela Ediciones, Ediciones Radagast, HT Publishers y Ediciones PY.
Les speed dates van tener llugar los dos díes nos que trescurre l’eventu, tanto’l sábadu 2 como’l domingu 3 d’avientu. Como tol alcuentru, van allugase nel Antiguu Institutu Xovellanos, Xixón.
Dexámosvos l’enllaz al formulariu calcando equí.
