Anque se basaba na Digimon Virtual Pet, una especie de Tamagotchi, nun principiu la serie pintaba ser una copia descarada de Pokemon. Por embargu, Digimon tuvo un argumentu y una estética propia qu’embruxilaron a una montonera fans, especialmente pente la llinia divisoria ente millennials tardíos y los primeros zoomers. La principal diferencia, pelo menos pa un lego nes dos series, yera que nesta se pasaben trés pueblos coles evoluciones de los monstruínos, convirtiéndose en seres xigantescos, davezu humanoides, y con más armes de que les compra Rambo nel Black Friday. Nel planu argumental, la diferencia alcontrábase sobre manera en qu’esistíen dos mundos: el “normal”, del que proveníen los neños protagonistes, y el dixital, un mundu paralelu nel que vivíen les creatures.
El casu ye que les dos primeres temporaes de la serie trataben la mesma hestoria. Bono, na primera los protagonistes yeren unos rapazos, y na segunda taben yá mayorinos, pero esistía un filu argumental evidente. Por embargu, la serie siguió, y a partir de la tercer temporada yá trataben otres hestories que nun teníen que ver colos personaxes orixinales. Ye esta primer etapa y na mayoría solo esta la que ta grabada a fueu na señardá de los fans, y ye por ello que, dacuando, vuelven a ella.
Esi ye’l casu d’esti ún d’avientu, porque esi día va llegar a los cines d’España una película nueva de la saga (en versión orixinal, castellanu y catalán). Digimon Adventure 02: The Beginning (el 02 ye porque los personaxes tán crecíos, como na segunda temporada) preséntase con un enfoque más adultu, asina como más adultu ye tamién el so públicu oxetivu. Sicasí, esi sotítulu fainos pensar que nun ye namás un fan service pa espertar les alcordances d’infancia d’unos yá paisanos, sinón que, pelacontra, intenten revilvar la franquicia pa trayela de vuelta.
Dexámosvos l’avance calcando equí, por si sois d’a los que la hestoria-yos toca’l corazón.
