El Summer Game Fest d’esti añu (celebráu va dos díes) trai abondes novedaes, y dos de les más llamaderes tienen dalgo en común: Son entregues nueves de sagues perconocíes, que ñacieron va más de trés décades, tiénense desendolcao a lo llargo de los años al empar que la teunoloxía… y, agora, vuelven a los sos oríxenes con xuegos en dos dimensiones. Estes sagues son Sonic y Prince of Persia.

Con Sonic Superstars, SEGA vuelve col corcuspín azul más rápidu y famosu del mundu (bono, val, nun ye qu’haya munchos corcuspinos azules) nun xuegu que, anque los gráficos (y paez ser que dalguna pantalla) son en 3D, prometen una esperiencia mui asemeyada a la de los xuegos clásicos del personaxe de Master System y Mega Drive. Ye un xuegu de plataformes multixugador (nel que vamos poder escoyer ente Sonic y los sos amigos) y nel que resulta bultable que la velocidá y la señardá van ser componentes esenciales. Estrénase esta seronda pa PC, PlayStation y Xbox (nun ta confirmáu pa Switch) y dexámosvos l’avance calcando equí.

Per otru llau, con Prince of Persia: The Lost Crown, Ubisoft trainos una aventura nueva d’aición, plataformes, maxa y mitoloxía que, magar ser de gráficos tridimensionales, garra la xugabilidá y l’aspeutu de los xuegos más clásicos de saga, un estilu metroidvania nel que dir avanzando pa la drecha. Facía más de diez años desque nun salía un xuegu de la franquicia, y si esti yera tamién en 2D yera por ser fechu pa teléfonos móviles. Estrénase’l dieciocho de xineru de 2024 en PlayStation, Xbox, Switch y PC. Dexámosvos l’avance calcando equí.

El casu ye que, magar l’entusiasmu col que presentaron los xuegos y munchos xugadores recibieron les noticies, tamién hai un seutor importante del públicu al que nun-y ficieron tanta gracia. L’anunciu en YouTube del nuevu Prince of Persia tien votos negativos a esgaya, con comentarios criticando que paez un xuegu de teléfonu. Y al preciu de Sonic, que ta a 59´99$ (n’Europa van ser 69’99€) tamién-y ta cayendo la de Dios, porque munchos internautes consideren qu’un xuegu en 2D nun habría tener, nin p’atrás, el mesmu preciu qu’ún en 3D.

¿Tais d’alcuerdu coles crítiques, o pensáis que son toos unos repunantes? El veredictu dexámosvoslu a vós.

Leave a Reply

La to direición de corréu nun va espublizase. Los campos riquíos márquense con *