Por Adrián Carbayales
La moda de les películes de superhéroes pillóme siendo yá adolescente. Prestóme pola vida ver n’imaxe real los personaxes de los que tenía tanto lleío, y daveres que m’allegra muncho que pasara, anque creyo que nunca nun va dexar de chocame que la qu’agora ye la película más recaldosa de la historia remaneza de lo que lleía de guaḥe y mui pocos entendíen que me gustara.
Y ye que los superhéroes se crearon pa los neños. Anguaño cuasi paez que tas insultando a quien-y gusten cuando mentas esto, magar que ye daqué indiscutible. Esi yera’l so públicu pelo menos de los años trenta a los sesenta, fasta Stan Lee descubrir ablucáu que tenía clubs d’aficionaos a Marvel nes universidaes. Y entós, adulces, la industria foi enveredando les hestories per siendes más adultes; los héroes enfrentáronse a les drogues, a crisis esistenciales, a políticos populistes… Y llegó Watchmen, que calla la boca a tol que tiente de negar qu’una hestoria de superhéroes pue tar dirixida al públicu adulto. D’otra manera, en cine… bono, el cine ye otru mediu, y tien regles distintes.
Lo que nun cómic cuesta unes llinies de tinta y una imprentación en cuatricolor, nuna película pue significar millones de dólares n’efeutos especiales. Y les compañes cinematográfiques nun son tontes, tienen d’amortizar les perres que gasten. Asina, cuando atoparon la fórmula máxica que facía percodaloses unes películes tan cares, nun fixeron más que repetir la fórmula pa les vinientes. Más o menos ye esta: Un puntu consigue poderes nun aicidente, o quiciabes descubre que ñació siendo especial, apaez un malu mui malu que quier un cosu (davezu brillosu) col que sedría a conquistar el mundu, y entós l’héroe ha deprender a remanar los superpoderes pa salvar la xente que quier. Ah, y hai pehí una mocina pa da-y romanticismu, y unes cuantes chancies pa engayolar. Cuando la protagonista ye una muyer viéndenlo como una gran vuelta feminista, si ye negru como una defensa valiente de la multiculturalidá, pero tán toes feches col mesmu moldu. Hai quien miró de facer daqué adulto poniendo héroes enfocicaos y perviolentos, pero eso nun ye más que la fantasía de lo que ye adulto pa un rapaz rebelón. Y yo, porque dacuando, mui poques vegaes, asoma la maxa que de neñu m’embruxiló, siguí viendo o trazando de ver les películes nueves, cansu pero como arrastráu pola ramada, como un autómata adormentáu. Esperando murniu a que la chispa volviera a prendese.
Y nesa vieno Wandavision.
El vienres que sacaben el postrer episodiu sentíme como cuando de guaḥe restolaba ente les novedaes acabantes de llegar al quiosqueru. Tenía la mesma ilusión, y ye que Wandavision ye a poner d’alcuerdu’l paisanu que yes col neñu qu’aínda tienes no fondero. Sí, pinta como les películes Marvel, tien les chancies tan propies d’estes, más efeutos especiales de los que les más de les compañes sedríen a costiar; y la estructura, anque nun entamu ablucante, va tornándose más convencional según avanza la serie. Por embargu, too ello ta al serviciu d’una hestoria sobre l’amor, la perda, el duelgu, la señardá y milenta emociones pa les que les lluces de colorines nun son más qu’emperexilamientu, una forma de llamar l’atención. La hestoria tien raigañu nos cómics sobre la Bruxa Escarlata y Visión qu’un cientu d’autores fixeron a lo llargo de les décades, y al empar crea daqué nuevo que nun podría crease más que como serie de televisión. Ye una comedia, un drama, fantasía y ciencia-ficción; tien cachos llerciosos, sorpreses inesperaes, fai homenaxe y tamién parodia de setenta años d’historia televisiva. Elizabeth Olsen demuestra ser una actriz maraviosa que tien muncho qu’ufrir, siendo capaz de tresmitir la dulzura más candial, la rabia más tarrecible y una llástima qu’atristaya’l sangre. Ye prueba mui significativa una imaxe del storyboard, onde sal que’l personaxe tien de resultar amenazador a un receicionista y la dibuxen faciendo degomanes y con lluces escarlates saliendo-y de les manes. Nun fixo falta, a Elizabeth valió-y con mirar torcío pa que nos paeza que lu atortoró.
Si la serie tien un defeutu ye’l mesmu que’l de los cómics de superhéroes: Ye malu aportar metá l’enguedeyu y escomenzar polo que te peta, porque ye más que probable que nun pescancies un res. Nun creyo que daquién puea esfrutar la serie ensin ver primero les películes de los Vengadores, y yá son unes cuantes les que salieron. Teo lleío de xente qu’aínda viéndoles pasó los primeros episodios un poco desconcertao, y faime gracia qu’hai quien esperaba lo mesmo de siempre y, al pasar unos cuantos episodios ensin ver hosties, dexóla fadiáu. Si yes de los pocos que nun vio les películes del superequipu Marvel, pa mio idea paga la pena l’esfuerciu de ponese a ello si nun te dan demasiáu refugu. Y ye que me paez inconcebible ver Wandavision y nun rir, respigase y empapiellar.
Nun sé, pue que tea dexándome llevar y abultando la importancia y la calidá la serie, nun digo que non. Pero ye que prendió la chispa n’interior del autómata adormentáu, el fueu arde y los neños tienen enclín a desaxerar.
