Ayeri mesmo comentábamosvos (equí) que Henry Cavill quedaba ensin ser Superman pol reestructuramientu que ta sufriendo DC. Lo que, amás, tuvo d’amola-y bastante, porque, que se sepa, esa foi la razón principal pola qu’e dexó pa prau’abandonó la serie de The Witcher. Y por embargu, paez que ye a recuperase prontísimo de les adversidaes. The Hollywood Reporter anuncia (equí) qu’Amazon ta preparando una serie del popular xuegu de mesa Warhammer 40,000, y que la idea ye que Henry Cavill la protagonice. Ye verdá que tovía nun tienen robláu’l tratu con Games Workshop, la propietaria de los drechos, pero sí informen de que nel final de les negociaciones. Y tamién informen, lo qu’amás ye d’esperar polo ampliu que ye l’universu nel que s’ambienta’l xuegu, con decenes de noveles y unos cuantos videoxuegos ambientaos nél, que de tener ésitu seya’l principiu d’una franquicia de ponderes n’universu compartíu.
Warhammer 40,000 ye un popular y complexu xuegu de mesa creáu en 1987 como una versión futurista, distópica gótica y con tintes d’horror del más clásicu Warhammer Fantasy Battle. Nél controles un exércitu representáu por figures coleicionables y pintables qu’ha vencer al del rival, y ente les posibilidaes a escoyer hai marines espaciales, güerkos (versión estraterrestre de los güercos), demoños veníos d’otra dimensión o hasta monxes guerreres. Y dientro de cada exércitu, hai decenes d’unidaes distintes como puen ser infantería, tanques o monstruos escomanaos. El propiu Henry Cavill tiense declarao xugador y fan.
