Warner Bros. acaba de llegar a un gran alcuerdu cola editorial indie Dynamite, lo que nos promete l’adaptación a cómics d’un montonáu de sagues famoses que son de lo más apetecederes.
De mano, pueque lo más llamadero, van trayenos unes versiones nueves de los personaxes de series d’animación de Hannah Barbera, cosa que va unos años intentó DC y na que nun atinó muncho (como con una versión apocalíptica de Scooby Doo con un Shaggy hipster). El superhéroe La Pantasma del Espaciu, los famosos Picapiedra o l’aventureru adolescente Jonny Quest sedríen dalgunes de les primeres series planiaes a esti respective. Pero nun sedríen, nin muncho les úniques.
Y ye que la cosa va muncho más allá. Por casu, tamién preparen una adaptación de la clásica El Magu d’Oz (de la película), asina como de dibuxos clásicos de la etapa de Cartoon Network, como Powerpuff Girls.
Eso sí, nengún d’estos va ser el primeru en llegar, porque yá s’anunció que los primeros personaxes de los que van asoleyar una versión nueva son los míticos Thundercats, los héroes felinos de la serie d’animación ochentera. El primer númberu de la so serie, na que prometen que van presentar una versión actualizada pero atemporal de los personaxes, tien al guionista Shalvey (Alien, Deadpool vs. Old Man Logan) y el dibuxante Drew Moss (Vampirella/Red Sonja, Gargoyles: Dark Ages) al cargu. Por si nun vos suena esti clásicu de l’animación, Thundercats trataba d’unos estraterrestres con poderes felinos (ún ye como un lleón, otra como un guepardu, otru como una pantera…) qu’acaben náufragos nuna Tierra futura y posapocalíptica, na que, por si fuera poco’l problema, han d’enfrentase a una riestra de monstruos comandaos por una momia qu’hincha como si fuera Hulk. Hai qu’esperar un poco pa la estrena, tamién ye verdá, pos el primer númberu sal en febreru de 2024.
