Agora que ta a piques de salir Watch Dogs Legion, quiciabes convién facer un repasín de lo que foi Watch Dogs 2 y por qué mos paez que ye ún de los videoxuegos más interesantes de toos nunes cuantes coses.

Pal que nun conoza la serie Watch Dogs, tamos énte un xuegu d’estilu “GTA-like”; esto ye, que reproduz l’esquema de videoxuegu que popularizó GTA III y los que vinieron darréu: Esto ye, tercera persona, capacidá d’entrar en vehículos (los más d’ellos terrestres) y de disparar nun mundu abiertu nel qu’hai misiones principales y misiones secundaries. La diferencia que tien la saga Watch Dogs pa con GTA ye’l fechu de qu’en Watch Dogs amás d’un bon arsenal d’armes de fueu y esplosives, el xugador tien a la so disposición la capacidá de hackear oxetos de la ciudá, dende lluces a semáforos pasando pelos “bolardos”, los caxeros y otros teléfonos móviles.

En Watch Dogs 1 la historia diba dibuxando yá delles dellos de los preseos que más sero diba emplegar Watch Dogs 2: El sistema CtOS que domina tola ciudá y nel que participen empreses multinacionales de teunoloxía, col que la “mala xente” controla la vida de les persones y una difícil rellación ente les empreses de teunoloxía y el crime, onde s’insinúa qu’hai un triángulu crimen organizáu / empreses teunolóxiques / poderes públicos que trabaya a la escontra del ciudadanu común.

Watch Dogs 2: Un xuegu políticu (y críticu)

Afirmar que Watch Dogs 2 ye un xuegu políticu pue paecer daqué evidente ¿Qué creación artística nun lo ye? Hasta les que pretenden nun lo ser acaben por tresmitir una cierta posición política. Pero lo que Watch Dogs 2 ye (o paez ser) ye un video xuegu anti-sistema. Nel que se critiquen munches de les realidaes de les grandes compañíes. P’analizalo, dende Refuelgu.com quiximos compartir esti vídeo nel que vais poder ver delles cosuques nesta llinia:

Una de les misiones más crítiques de toes

Un análisis rápidu:

  • Crítica a Google: La misión asocede en “Nudle”, un llugar enforma asemeyáu a la sede de Google en Silicon Valey.
  • L’actitú hipster: Nel autobús, hai referencies a los “super alimentos” y a delles bebides hipster”
  • Racismu: WD2 recuerda que la presencia de negros tovía nun ye “normal” en dellos ámbitos, como, por exemplu, Silicon Valley.
  • Comerciar cola vida privada: Nel entamu de la misión fálase de cómo “Nudle” comercia cola vida privada de la xente.

Esto namás ye una misión; ensin dulda una de les más importantes y relevantes nes que se reflexen estes crítiques. Sicasí, hai bien d’otres como, por exemplu, misiones nes que s’infiltra una relixión que tien muncha traza d’asemeyase a la ciencioloxía y otres nes que se traten otros aspeutos de la cultura política americana. Frente a Watch Dogs 1, onde la exa central del videoxuegu yera una llucha individual na que’l personaxe buscaba venganza (no que nun dexa de ser una actitú daqué fascista).

El xuegu que-y podría prestar a Julian Assange

Otru llugar nel que Watch Dogs 2 camuda radicalmente en rellación con Watch Dogs 1 ye la razón pola que se faen los ataques hacker. Si na primera entrega de la serie les causes yeren les de buscar la venganza, en Watch Dogs 2 la cuestión del hackeo ye, dende’l propiu tutorial del xuegu, una xera coleutiva. De fechu, nel Watch Dogs 2 vamos interpretar el papel d’un personaxe que ye miembru d’un grupu hacker nomáu Dedsec, qu’anque yá saliere de mou secundariu nel 1, agora conviértese na organización pa la que trabayamos y pola que lluchamos. Dedsec (que nun dexa de ser a Anonymous lo que Nudle ye a Google), tien como oxetivu l’algamar milenta siguidores nes redes sociales… non por una cuestión d’ego, sinón, más bien, pa emplegar toos esos teléfonos y ordenadores y, dende ellos, llanzar ataques DoS.

D’esti mou, Dedsec intervién na política creando manifestaciones, interviniendo nes eleiciones pa facer campaña a la escontra d’un congresista dañín y en munches otres coses. El xuegu critica l’actitú de corrupción y violencia policiales y normaliza’l rol de les persones transexuales en delles misiones que tenemos que facer pa una conceyala transexual d’Oakland.

América vista dende Europa.

Dende llueu, considerar qu’un video xuegu fechu por una multinacional cola importancia y la facturación que tien Ubisoft ye “‘antisistema” pue ser un poco atrevío. Sicasí, nun dexa d’haber ellementos nesti xuegu que non solo faen que pague la pena xugase sinón que, tamién, faennos reflexonar sobre si ye posible una contra-cultura dende productos culturales del grandor y l’amplitú d’una película o d’un videoxuegu; que poles sos propies dinámiques precisen d’un presupuestu enforma grande. Tamién, surde otra cuestión: ¿Diba ser posible un xuegu d’estes carauterístiques, ambientáu nos EEXX, si la compañía que lu fai nun fore europea? Ubisoft ye – y puedo aseguravos que nun mos paguen; anque tamos abiertos a cualquier collaboración 😉 – una de les poques compañíes que s’atreven a facer esti tipu de coses y, seguramente la única, que sacó a Marx nun videoxuegu.

Ubisoft nun ye una compañía marxista… …pero pue que seya de les poques que faen videoxuegos nos que sal Karl Marx.

1 comentariu


Leave a Reply

La to direición de corréu nun va espublizase. Los campos riquíos márquense con *