La serie nueva de Tim Burton ta arrasando en Netflix, y la verdá que nun-y falten razones pa ello. De mano, porque ye sobre la familia Addams, una franquicia perconocida que ñació como viñeta cómica nos periódicos pero de la que dende los sesenta yá salieron series y películes, d’animación y d’aición real, y hasta un cruz cola serie de Batman d’Adam West. L’adautación más recordada, por embargu, ye la de los años noventa, aquella que tenía actores como Anjelica Houston faciendo de Morticia, o Raul Julia como Gómez. Con ella saltó a la fama Christina Ricci siendo namás una guaḥina, faciendo’l popular papel de la fía nihilista y sicópata Wednesday.
Dándo-y una vuelta de tuerca al conceutu, y alloñándose un poco del restu de la familia, Tim Burton produz (y en parte dirixe) una serie centrada na rapaza, agora más mayor y nun internáu pa “marxinaos” nel qu’abonden seres máxicos como vampiros, homes-llobu y serenes. Nun internáu que recuerda, quiciabes demasiao, al Hogwarts de la saga Harry Potter o a la Escuela Salvatore de The Vampire Diaries, pero ye que de xuru qu’una de les claves del ésitu del productu ye encaxar nesi algoritmu misteriosu del ésitu de streaming. Esto nun ye malo en sí mesmo, pero sí ye verdá qu’afala a ellaborar productos menos arriesgaos. Pero bono, el casu ye que, mientres nos presenten los requexos del institutu y el cercanu pueblu puritanu, una serie d’asesinatos misteriosos vuelve a Wednesday una Veronica Mars de lo sobrenatural.
Asina, anque la serie bebe de la mitoloxía de la familia Addams, ta claro que la cosa va per otros caminos, y por más que salgan dacuando los personaxes de tola vida, ye Wednesday y solo ella la que soporta’l pesu de caltener l’espíritu orixinal. Conque Jenna Ortega, l’actriz que la interpreta, acostacia una responsabilidá tremenda… y failo de manera espectacular. Nun chisga los güeyos nin una vegada pa tener un aspeutu esmolecedor, toca’l violonchelu tan agorrumbada que la so figura tórnase monstruosa, da fondura abonda al personaxe pa qu’esi chiste de la familia con valores invertíos nun resulte infantil, sinón que lu vuelve en parte sicopatía y en parte introversión adolescente. Tolo que tien que ver cola actriz ye de diez.
El restu de la serie tien puntos fuertes y puntos floxos, especialmente nótase un baxón tres de los cuatro episodios que dirixe Burton, anque a partir del séptimu vuelve a recuperar un poco. Destaca tamién la influyencia de les películes de los noventa na interpretación de Catherine Zeta-Jones como Morticia, un Luis Guzmán con un aspeutu más fiel al Gómez orixinal que Julia y la participación de Christina Ricci como profesora.
En resultancia, ye una serie que nun revoluciona la forma de facer televisión, pos queda un productu más bien tirando a xenéricu, pero que ta entreteníu.
