Whoopi Goldberg ye una actriz bien consagrada, ganadora d’un Oscar, un Grammy, un Tony y un Emmy, y que con películes como Ghost, Sister Act y el papel de Guinan en Star Trek: The Next Generation llegó a los nuesos corazones.
Agora, colos sesenta y siete años que tien, debuta como autora de la so primer novela gráfica, talamente como tán faciendo últimamente otros actores, como son casu Emilia Clarke con M.O.M.: Mother of Madness o Keanu Reeves con BRZRKR. Y anque estos últimos trabayen nos cómics de la mano d’un guionista esperimentáu que la co-escribe con ellos, nesti casu l’actriz collabora con Jaime Paglia, más fechu al mundu de la televisión (pos ye direutor, guionista y productor, con series nel currículu como Eureka, The Flash o Scream). Al dibuxu, mientres, va tar Sunkanmi Akinboye, l’autor de cómics como Windmaker y E.X.O.: The Legend of Wale Williams, destacando dambes dos obres pola inclusión d’elementos de cultures africanes n’argumentos fantásticos.
El casu ye que, toos ellos xuntos, van sacar The Change, una obra protagonizada por una superheroína na que ye evidente l’asemeyu a l’actriz (cosa que yá pasó con Keanu Reeves en BRZRKR, y que nun estrañaría que tuviera l’envís, en dambos dos casos de que foren ellos mesmos los que protagonizaren una posible adautación). A esti personaxe sabemos poco de momentu, namás que cola menopausia-y vendríen, amás de los sofocos típicos y esa clas de coses, unos superpoderes que la obligaríen a replantegase les coses.
The Change ye una novela gráfica (un solu númberu) que nos EE.UU. publica Dark Horse el ventiocho de payares d’esti añu.