Como parte de la política nueva de la que vos tenemos falao nesti portal (la última noticia y na que vos aportamos más datos tenéisla calcando equí), Disney fai un borráu masivu de coses que-y sobre na so canal de streaming, Disney +, mientres prepara una fusión con Hulu. La idea que ta darrera ye poner penriba la calidá que la cantidá, y pa ello tomen midíes como eliminar conteníu superfluu y con poco ésitu, nun sobreesplotar les franquicies más potentes (Marvel o Star Wars) o mesmamente ceder los derechos d’otres más modestes a otres canales.
Asina, agora llega’l que pelo menos ye’l primer gran borráu de conteníu, y ente les víctimes destaca la primer y agora yá última temporada de Willow, la serie que trayía de vuelta los personaxes del clásicu de fantasía homónimu de 1988. Y ye que, magar que’l creador afirmó que la serie nun taba cancelada de manera definitiva, que los actores quedaben llibres d’axenda pa poder facer otres coses mentanto se tomaben una posa pa pensar cómo empobinala, y el protagonista Warwick Davis ñégabase a creyer que yera’l final, too paecía indicar que la cosa diba quedar ehí pa siempre. Les males crítiques y podemos suponer que les poques vistes de la serie ficieron acabar con ella cuasi namás estrenala, y agora bórrenla de la única canal na que se podía ver de manera llegal, nun quedando niciu dalu d’ella.
Otres de les series y reality shows que caen pa, n’apariencia, nun volver enxamás, son, por mentar delles, la basada nel cómic homónimu Y: The Last Man, Stargirl, Dollface, Encore! o Stuntman, ente otres decenes. Siempre esiste la posibilidá de que, como apuntaben pa la esplotación futura de franquicies menores, viendan o cedan los derechos, pero coles crisis y modificaciones que ta habiendo tamién n’otres canales (HBO fizo lo mesmo va unos meses) pinta a que la burbuya del streaming paez españar, y les coses nun pinten bien pa estos programes.
