(ACTUALIZACIÓN) Magar espublizase la noticia en medios de renome como Deadline, The Hollywood Reporter o Fotogramas, el direutor de Willow anuncia que la serie nun ta definitivamente cancelada. Sí ye verdá, comenta, que nun se planteguen empezar a rodar la segunda temporada pelo menos nos próximos doce meses, y asina lliberen al repartu pa que se puean dedicase a otres coses. Darréu, dexámosvos l’artículu orixinal:
Según informa Deadline (podéis ver l’artículu orixinal calcando equí) la canal de streaming anuncia que nun va siguir produciendo la serie Willow, masque teníen planiao sacar trés temporaes y namás que salió una, amás de que foi va bien poco. Y puesto que tampoco ye que la crítica fora mala, la cosa abulta a que ye pola mor del númberu d’espectadores, o de la baxada d’estos del primer al últimu capítulu. Conviértese, d’esta manera, nel primer gran fracasu de Disney +, la primer serie de la qu’anuncien que nun van siguir colos planes que teníen. Lo que, per otru llau, nun ha sorprendenos, porque yá taben anunciando (como vos contemos equí) que la compaña ta revisando los sos proyeutos pa poner penriba la calidá que la cantidá, lo que va afeutar mesmamente hasta a les grandes franquicies como’l MCU y Star Wars.
La serie taba basada nel clásicu de fantasía homónimu de Lucasfilm, una película de cultu de los ochenta sobre bruxes, guerreros, nanos y lladrones. Como continuación d’ella, ambientada unes cuantes décades dempués, la serie contaba nel elencu col protagonista de la historia orixinal, interpretáu por Warwick Davies, anque pueque con un papel escesivamente secundariu en dellos episodios. Esto y la falta d’otru de los personaxes principales, al qu’interpretara nel so momentu Val Kilmer, puen ser dos de les grandes causes del fracasu.
Por si nun la vistis y tenéis curiosidá, esti ye l’avance de la serie cancelada.
