Los universos en comuña son una custión más de moda que nunca coles películaes y series de Marvel, por namás mentar el más famosu. DC Studios tamién tenta de facelo, anque de momentu ensin munchu ésitu, y tamién tenemos, por casu, el Monsterverse de King Kong y Godzilla. Por embargu, hai un universu que nun conoz muncha xente, anque toos tán familiarizaos los más de los sos personaxes. Y ye que, si pienses un personaxe cualesquiera, propiu d’una novela popular de los sieglos XIX o XX, o hasta d’un cómic, una serie o una película, ye mui pero que mui probable que lu incorporaren al universu. ¿Cómo? ¿Por qué? ¿Por quién? Vamos velo darréu.

Philip José Farmer yera un escritor que nun conoz abonda xente, pero que munchos de los que lu conocen lleenlu con fervor. La so saga más nomada ye la de Riverworld, pero la que produz más pasión y fanfics nes redes ye la de les noveles conocíes como Wold Newton. ¿Y eso qué ye? Pos la premisa ye esta: En 1795 cayó un meteoritu nel pueblín de Wold Newton, Yorkshire. Esi ye un fechu real. Pero lo qu’amiesta Farmer ye que la radiación d’esti produxo mutaciones xenétiques na población, non bultables pero que s’herieden y permiten realizar fazañes estraordinaries. Nun ye exautamente que seyan superhéroes y supervillanos, ye un poco más discreto. Y, d’ehí p’alantre, tolos descendientes de los afeutaos poseyen estes capacidaes.

Teoríes bien lloques

Por poner un casu, ún de los primeros ñacíos tres de la cayida del meteoritu foi William Clayton, tercer duque de Greystoke (y si vos suenen l’apellíu y el títulu pue que seya por Tarzán). Esti paisanu foi especialmente fecundu, teniendo trece muyeres y unes cuantes aventures, y asina tuvo como fíos, hermanastros ente ellos, personaxes como Philleas Fogg, Fu Manchú o James Moriarty. A esti caberu, pela so parte, conociéronlu un tiempu como’l pirata Capitán Nemo. Y másque Farmer afitó rellaciones ente abondos personaxes, son los fans los qu’ellaboren ensayos a esgaya nos que xuncen unos con otros y solucionen lo qu’a primer vista son contradicciones. Por mentar dalguna d’estes, ente les hestories orixinales y los refritos de Sherlock Holmes tenemos tantos casos que nun paez posible que llevara toos la mesma persona (sobre manera polos munchos casos descritos de “la rata de Sumatra”, que Watson menta nos diarios pero Conan Doyle nunca nun editó). Los woldnewtonistes ígüenlo col llamáu Síndrome del Gran Detective; la fama de Sherlock clisaba a cualesquier otru detective, por bonos que foren, y dellos acabaron alloriando y pensándose (o faciéndose) pasar por él.

Apaecieron, tamién, otres obres influyíes pola obra de Farmer, como la ucronía de Kim Newman, Anno Dracula, na que’l conde sobrevive a Van Helsing y los suyos y acaba casando cola reina Victoria. Nestes noveles de Newman esplícase que toles versiones de Drácula de les distintes noveles, películes o hestorietes son “clones d’alma” qu’él pue crear inxertando alcordances suyes o esformaes n’otros vampiros, y los woldnewtonistes tomaron esta esplicación como propia pa les sos teoríes. L’árbol xenealóxicu de la familia Frankenstein, pela so parte, ye de lo más complexu, pues tien de dar un familiar pa cada versión del científicu. Y cuando traten d’entemecelo too col correllatu que tien na lliteratura francesa, Les Compagnons de l’Ombre, col otru gran pastiche que son los cómics de The League of Extraordinary Gentlemen (del que yá falemos en Refuelgu, equí), con películes, series de televisión o colos universos de Marvel y DC (falando de que los superpoderes tán esaxeraos nes hestorietes como métodu publicitariu, pa d’esta manera nun perder la esencia del universu d’héroes d’aventures, y convirtiendo a los personaxes que nun avieyen en legaos que van de pas a fíos) la cosa enguedéyase más y más hasta cuasi lo imposible. Pero la gracia ta en tratar de da-y otra vuelta de tuerca a too, pa consiguir que les coses casen meyor qu’enantes y construyir un universu más coherente, dientro de la llocura que ye’l mecigayu.

Asina que si te presta la lliteratura popular y busques dalguna afición nueva, dexámoste equí una que pue dexate bien encerriscáu. Si te da coruxía, podemos date tamién un enllaz a la páxina qu’axunta munchos d’estos trabayos, y a otra que con munchu detalle céntrase nos monstruos más conocíos.

Leave a Reply

La to direición de corréu nun va espublizase. Los campos riquíos márquense con *