Va unos meses (equí) contábemosvos que Marvel creaba un sellu editorial específicu pa les llicencies de Fox Studios. Y ye qu’estes tán volviéndose, adulces, una parte importate de la editorial desque Disney (propietaria de les dos compañes) principió a ceder a la editorial los drechos pa facer cómics de les sagues más famoses de los estudios. Escomenzaron con Alien, depués Predator, y acaba de salir tamién una serie de The Planet of the Apes. Les posibilidaes son, en verdá, incontables: podríen incluyir nel sellu, por mentar dellos exemplos, una serie de The X-Files, de The Simpsons, d’Independence Day, de Die Hard o de Buffy the Vampire Slayer (esta última, pelo menos de momentu, aguanta como llicencia de BOOM! Studios).
Pero ye de suponer que tampoco nun quieren sobreesplotar les posibilidaes sinón dir de poco en poco p’aprovechar tol potencial que tien caúna d’elles… D’ehí que, de momentu, namás tiren con trés. Anque, como yera de suponer nun mediu con tantu enclín a ello, el cruz ente estes llicencies y los personaxes clásicos de Marvel yera namás cuestión de tiempu. ¡Si yá lo tienen fecho hasta en portaes especiales!
El primer (pero de xuru que non últimu) cruz que vien ye nada menos que Predator versus Wolverine, una serie curtia de cuatro númberos na quel cazador estraterrestre va atopar una presa que promete ser bien difícil, el mutante más famosu y con más mal humor del Universu Marvel. L’escritor al cargu de narrar esti enfrentamientu ye Benjamin Percy (actual guionista de la serie regular Wolverine), y va acompañalu un dibuxante distintu en cada númberu: Greg Land, Andrea Di Vito, Ken Lashley y Kei Zama. Y ye que la hestoria nun va ser un solu relatu al usu, sinón que’l choque de los dos lluchadores va dase a lo llargo de les distintes etapes de la vida de Logan. El primer númberu, paez ser, va tar ambientáu nos tiempos nos que debala pelos montes de Canadá, namás que-y punxeron l’esqueletu d’adamantiu, mientres que nos otros episodios va tar, por casu, na isla de Madripoor na etapa cuando lu conocíen como Parche. “Esta cacería épica dura décades, pos los dos xigantes deprienden, endurécense y vuélvense más mortíferos col tiempu”, diz Percy, que se muestra más ilusionáu tovía de lo que podría esperase: “Nun pueo dicir que ñaciera pa escribir esti cruz… pero dacuando l’universu revela por qué te crearon. Soi fíu de los ochenta. Nun pueo dicir cuántes vegaes tengo visto Predator, como nun pueo dicir cuántos cómics de Wolverine tengo lleío, porque eso ye como dicir cuántes vegaes tengo alendao o cuántes hamburgueses tengo comío. Les mitoloxíes de dambos dos personaxes tán tan enraigonaes en min que podríen considerase parte’l mio ADN o cachos de la mio alma.”
El primer númberu de la serie espérase pa setiembre (nos EEUU), conque podemos suponer que Panini va sacala en castellanu nun tomín como en primavera de 2024.
