Les coses tán cambiando muncho nel universu cinematográficu de DC dende que James Gunn y Peter Safran tomaron el mandu, y paez ser que la última víctima d’esta revolución ye la tercer parte de Wonder Woman. El guión, escritu pola direutora Patty Jenkins mano a mano col famosu guionista de cómics Geoff Johns, nun paez casar colo que Gunn tien planiao pal futuru de DC Studios, conque, énte los cambios qu’esixó facer, Jenkins ñegóse y abaxa del barcu. Y asina, ensin timonel, Wonder Woman 3 paez quedar nel llimbu.
Ye más, ye la mesma protagonista, Gal Gadot, la qu’escribió un twit que bien pue sonar a una despidida pa siempre del personaxe:
“Va unos años anuncióse que yo diba interpretar a Wonder Woman. Toi mui agradecida pola oportunidá d’interpretar un personaxe tan increyible y icónicu y, más que nada, toi agradecida por vós. Los fans. Naguo por compartir el próximu capítulu con vós.“
