En 1992, xusto depués de que Chris Claremont dexara de guionizar los cómics de los X-Men (xera que facía dende 1975, convirtiéndolos d’un equipu segundón a les mayores estrelles de Marvel), estrenóse en televisión una serie animada que foi prestosísima pa los aficionaos y diolos a conocer al restu del mundu, muncho primero de la película del 2000 tan famosa.
Pueque l’ésitu de la serie se debiera a basase naquelles hestories clásiques de Claremont, pero remocicaes y coles traces más modernes de los personaxes; les que llevaben xusto naquella nos cómics, y que gracies a la serie son agora de les más recordaes. Por embargu, yá dende’l principiu aprucieron diferencies importantes al respeutive de los cómics, como l’apaición d’un personaxe, Morpho (anque nun durara muncho), que foi creación pa la serie y namás años depués pasó a facer parte tamién de les viñetes.
La serie, asina, duró cinco temporaes, setenta y seis episodios, y la cosa volvióse sobre sí mesma cuando estos s’adautaron tamién a cómics. La buelga que dexó n’alcordanza foi tala que tovía en 2015, como parte del eventu Secret Wars, salió una serie curtia de cómics que volvía al universu de la serie, y apocayá, l’añu pasáu, otra más.
El casu ye que la serie clásica ta disponible en Disney+ dende la estrena de la canal, y yá dende 2021 sabemos que tán tresnando una continuación pa siguila xusto nel momentu nel que la dexaron: cuando’l Profesor-X marcha de la tierra, y Magneto pasa a facer parte de los X-Men. Y ye agora, por fin, tenemos fecha, y ye qu’acaben d’anunciar que la serie nueva, X-Men ’97, va tar disponible na canal el trés de xineru de 2024. Per otru llau, y gracies a que Disney pue usar la banda sonora de la serie agora que compró Fox, valió con unes poques notes d’ella en Doctor Strange in the Multiverse of Madness y en Ms. Marvel pa espertar la señardá de los aficionaos y dir anunciando qu’un añu o otru van introducilos nel Universu Cinematográficu Marvel.
De momentu, polo que podemos ver nes poques imáxenes que nos muestren de la serie nueva de dibuxos, hai pequeñes diferencies como pue ser el peñáu de Storm, pero otres grandes como la resurreición de Morpho, la introducción del “Nuevu Mutante” Sunspot o del visitante del futuru Bishop. Y asina, prométennos siguir, cuasi trenta años depués de dexales nel llimbu, versiones nueves pero bien familiares de les hestories del supergrupu, abondo cambiaes pa sorprendenos pero non tanto pa nun nos sentir afayaos.
