Güei facemos una entrevista a Xon de la Campa tocántenes a la so primer novela, La bastarda de Pelayu.
¿Pues contanos de qué va la novela?
Paezme que’l títulu nun dexa llugar a duldes. Ye la hestoria d’una moza, fía bastarda del rei, nuna Asturies d’espada y bruxería. Hai aventures, engarraes, celos, sexu y muncha sangre.
Hasta agora escribieres dalgún rellatu y el cómic col qu’acabes de ganar el Premiu Alfonso Iglesias. ¿Dalguna diferencia con escribir novela? ¿Alcontrasti dalguna dificultá nueva?
La verdá ye que, en cuanto a cadarma, ye mui similar. En tolos casos, rellatu, cómic, novela, entamo con una idea-conceptu y llueu ye solo cuestión de desendolcala. Quiciás la mayor diferencia y tamién lo que, dende’l mio puntu de vista, -y da más dificultá a la novela ye’l fechu de que ye una hestoria necesariamente más grande. Hai más personaxes, trescurre más tiempu, hai más detalles. Al final tienes que tar relleendo lo qu’escribisti p’asegurate que too tien una coherencia y que fluye. Eso colos rellatos nun me pasa. Un rellatu ye un cuartu y veslu d’una sola güeyada. Una novela ye un xalé de munchos cuartos y tienes que tar revisitando caún p’alcordate en qu’estáu ta.
¿Qué influyencies tuvisti? La hestoria ye como mui ochentera, ¿non?
¡Ḥa ḥa ḥa! Supongo que sí. Pero nun ye que tuviera buscando dalgo estético o qu’agora mesmo tuviera de moda. Ye una cuestión de cuáles son les fontes de les que bebes. Y les míes son les 80 y los 90 y, claro, eso tien que reflexase no qu’escribo, igual que se reflexa no que me gusta lleer o ver. Cuándo creces lleendo a Claremont (X-Men), Tolkien, Asimov… Viendo películes como Conan, Excalibur, La Princesa Prometida o Willow ye normal que tires d’eses referencies pa facer coses.
Quiciás la mayor influencia pal personaxe principal seya La Patrulla X de Chris Claremont. Naquellos cómics de los 80, Claremont carauterizóse por crear unos personaxes femeninos fuertes, potentes, dueñes del so propiu destín anque tuvieren too escontra, que de guaḥe impresionóme muncho.
¿Cómo tas viviendo esti boom que ta habiendo na lliteratura fantástica n’asturianu?
Esti boom paezme fantásticu, nunca meyor dicho. Creo que tien muncho que ver col fechu de que les nueves xeneraciones yá nun s’avergoñen de dicir qué ye lo que-yos gusta. Hai un tiempu naide diba tomar en serio a un escritor que llistase como influyencia un guionista de cómics, casu de Claremont. Agora, siguirán les reticencies per parte del establishment lliterariu, pero yá nun hai vergoña en dicilo. En dicir estos son los mios referentes y esto ye lo que quiero escribir, dibuxar, filmar…etc. Y too eso, que tamién ta pasando nel restu d’España, ta garrando muncha fuercia na lliteratura asturiana y yo cuido que tien que ver col nuesu particular heriedu cultural no fantástico y sobrenatural, tán presentes nes tradiciones asturianes. Ye prestoso de ver.
¿Tas trabayando yá en dalgún otru proyeutu?
Pues sí. Agora tamos acabando un proyectu mui prestosu ente dellos autores qu’espero vea la lluz pronto. Van ser dellos llibrinos, caún d’un autor diferente pero con un universu compartíu. Y llueu, a mediu plazu, hai otru cómic per ehí que puede quedar prestosu.
La bastarda de Pelayu, tanto la versión orixinal n’asturianu como la traducción al castellanu, tán yá a la venta en llibreríes y na páxina de Radagast, que vos dexamos calcando equí.
