Dende 2009, l’agora Conseyería de Cultura, Política Llingüística y Turismu convoca un premiu a meyor cómic n’asturianu, anguaño con una dotación de seis mil euros y la publicación de la obra. Ayeri anuncióse que la victoria esti añu ye pal xixonés Xon de la Campa, que se presentó cola hestoria detectivesca Misteriu nel soterrañu.

Autor de tires en La Información de Bajo Nalón y la La Voz de Trubia, y tamién ilustrador d’obres como Depués d’ochobre, Drácula y L’horru de vapor, asina como de les portaes de La Colomina 36, 1809: Cartes de la Revolución de Trubia, Conan el bárbaru, Fort Paniceiros y les versiones n’asturianu y castellanu de La Rexenta contra Drácula. Tamién ye autor d’un relatu de 78 crímenes, 78 conceyos, d’otru de l’antoloxía yá mentada, L’horru de vapor, y tien yá en preventa la so primer novela, La bastarda de Pelayu, una obra de fantasía ambientada n’Asturies del sieglu VIII. Sicasí, esti ye’l primer cómic que va espublizase del autor.

La obra, de la que’l xuráu destaca “la corrección llingüística y la naturalidá de la llingua escrita”, trata sobre la investigación d’un asesinatu nel París de finales del sieglu XIX, y ye en gran manera (hasta nel sobretítulu, Les aventures del comisariu Hevia, al estilu de les de los volúmenes de Tintín o Blake y Mortimer) un homenaxe a la hestorieta franco-belga que ye gran influyencia pal autor. De la Campa nun escarta espublizar otres hestories del mesmu personaxe, anque agora tien yá otru proyectu ente manes del que nun quier adelantrar nada.

La so novela, La bastarda de Pelayu, ta yá en preventa na páxina de la editorial Radagast, y podéis comprala calcado equí.

Leave a Reply

La to direición de corréu nun va espublizase. Los campos riquíos márquense con *