Güei en Refuelgu falamos un poco con Xon de la Campa, ilustrador del L’Horru de Vapor y autor d’ún de los rellatos de l’antoloxía, pa saber un poco qué significa esta obra colectiva recién espublizada.
¿Por qué una antoloxía steampunk? ¿Qué mi’madre ye eso?
Home, ¿por qué non? El steampunk ye un xéneru mui poco tratáu nes lletres asturianes (si ye que se trató, nun lo sé, la verdá) y per otru llau ye un xéneru mui prestosu y agradecíu.
El steampunk ye en realidá un soxéneru de la ciencia-ficción qu’incorpora elementos retrofuturistes, con una estética mui decimonónica y, pelo menos nel casu d’esta antoloxía, l’usu de les máquines de vapor.
Lleísti toles hestories primero que naide pa poder ilustrar dalgo de caúna, ¿non? ¿Ves un filu en común ente elles o son toes mui distintes?
Sí, tuvi que lleeles toes pa faceme una idea y dibuxar la ilustración correspondiente. Una xera complicada con dalgunes d’elles porque per un llau quies dibuxar lo más llamadero, y per otru nun quies que la imaxe estripe’l xiru final.
Quiciás el filu conductor más obviu ye l’usu de tou tipu de maquinaria fantástico. Llueu les hestories en sí son mui diverses. Hai hestories mitolóxiques, xuliovernesques, carlistes, d’horror, republicanes… ye un batulaxe prestosísimu.
La verdá ye que la portada tien llamao munchísimo l’atención en redes. ¿Cómo se t’ocurrió?
La portada quier marcar la llinia cola qu’entama la coleición de L’Horru de Vapor y otros horros llocos. La idea yera usar dalgo mui icónico, dalgo inamovible, que nun cambiara en cientos d’años y ponelo en movimientu, nun desendolcu constante. D’ehí la idea d’un horru articuláu. La idea ye que dientro de la mesma coleición de L’Horru de… salgan otros títulos, otres antoloxíes de xente variopinto pa horros máxicos, espaciales, horrorosos, etc.
¿Y qué puedes contanos sobre cómo ye’l métodu hasta tener una portada terminada?
A la hora de trabayar nes portaes lo que suelo facer primero son dellos bocetos, y llueu llévolos al conseyu editorial de Radagast, onde, ente toos, afinamos la idea que nos paez más afayadiza. Con esa decisión final del CE póngome a trabayar na portada hasta qu’algamo’l productu final.
Últimamente hai muncha polémica nes redes coles ilustraciones feches con programes d’intelixencia artificial. Fálase de que van quitar trabayu, de que garren imáxenes con derechos pa programales… ¿qué pienses de too eso?
Reconozo que tengo opiniones alcontraes. Per un llau, paezme una ferramienta afayadiza p’aforrar tiempu y/o pa tener como referencia a la hora de dibuxar. Pero claro, per otra parte, si l’espoxigue y deprendimientu de la IA fáense a partir del trabayu d’otros autores, trabayu que ta protexíu poles lleis de derechos d’autor, entós lo que se produz ye un robu claru d’esos derechos.
Pienso que tienen que ser los gobiernos los que pongan unes llendes, los qu’establezan de forma nidia con qué y cómo puede deprender una IA. Ye un desafíu bien complexu.
Y volviendo al tema, agora como autor, ¿qué puedes contanos de la to hestoria na antoloxía? Yá t’estrenasti como escritor en 78 crimenes, 78 conceyos. ¿El procesu foi’l mesmu?
Pues cuido que la mía pue encuadrase en dalgo asemeyao al steampunk d’horror mitolóxicu. Anque tamién ye un poco Iron Man. ¡Ḥa ḥa ḥa!
Non, la verdá ye que se paez poco a la hestoria que fici pa 78 crímenes, 7 conceyos. Aquella siguía l’esquema de les noveles negres y, anque había dalgo d’aición al final, yera muncho más reposada de la que fici pa L’Horru de Vapor. Esta tien sangre, coraes y máquines chules.
Radagast acaba d’anunciar la to primer novela, La bastarda de Pelayu. ¿Puedes contanos yá dalgo d’ella?
Sí, va salir pa xunu, paezme. Puedo dicivos que yo pasélo mui bien escribiéndola. Ta mui influyida poles películes y cómics ochenteros colos que crecí. Y, como no que fici pa L’Horru de Vapor, tien muncha aición, sangre, sexu, coraes, maxa y personxes condergaos dende’l bierzu. ¡Ḥa ḥa ḥa!
L’Horru de Vapor ta yá en venta en llibreríes de toa Asturies o na páxina de Radagast Ediciones, calcando equí.