A la xunta d’Helena Seoane, autora de La otra cara de Morgana, y del editor de Radagast, Nicolás Bardio, l’autor Xon de la Campa va presentar la so primer novela esti xueves, a les 18:30, na Llibrería Cervantes (Uviéu).
La bastarda de Pelayu, tamién La hija bastarda de Pelayo, pos consta yá de traducción al castellanu, ye una novela de fantasía ambientada en tiempos de la Reconquista, pero dándo-y unos xiros a la historia pa meter pel mediu cuélebres y otres creatures mitolóxiques que-y dan a too un carís mui distintu. Pa nun estripala, remitímonos a la sinopsis oficial de la novela:
“Meyor que munchos homes nun mundu en qu’ellos manden, la última nacida cola “Marca del Cuélebre” ta llamada a xugar un papel fundamental na hestoria d’una Asturies na que conviven los vieyos dioses y los nuevos, la maxa y la espada, l’honor y la tradición y los humanos y les creatures máxiques. Una novela que revisita los mitos d’Asturies y fai con ellos una hestoria enllena de fantasía cola que pasalo bien del entamu a la fin.“
Xon de la Campa ilustra dende va tiempu obres de Radagast como Depués d’Ochobre o L’horru de vapor, asina como les portaes de munches de les noveles como son La Rexenta contra Drácula, Fort Paniceiros o 1809. Va unos meses ganó’l Premiu Alfonso Iglesias de cómic n’asturianu con Misteriu nel soterrañu (tovía ensin publicar) y ye ún de los organizadores de l’AsturCON, Convención de Fantasía Asturiana.
