El gobiernu central ta acabante de declarar l’estáu d’alarma en toa España y la cuarentena ye yá una realidá. Munches persones van tar obligaes a quedar en casa y nun salir más que pa dir al trabayu, a facer les compres nel supermercáu y a sacar el perru, si lu tienen. Pa munchos, la rutina nun va cambiar; pa otros, va ser ún de los momentos na vida en que más tiempu pasen en casa. Como #QuedaEnCasa ye’l mandatu d’estos díes y nun ta claro que tou esti procesu nun tenga unes consecuencies negatives, en Refuelgu queremos facer que la to vida seya más llevadera apurriéndote una serie de videoxuegos a los que pues xugar de baldre.
World of conquerors: estratexa y facer castiellos
Si yes d’esa xente qu’echó hores y hores col Age of Empires o si, cenciellamente, gústente los xuegos d’estratexa militar. World of Conquerors ye una bona escoyeta de baldre pa pasar la cuarentena. Al travie´s de la diplomacia y la conqusita, pues facete l’amu o amal del mundu. Ye fácil y cenciello y al algame de los más de procesadores. Pa ello, val con descargalu nesti enllaz de Steam. Amás de les lluches medievales, World of Conquerors permítenos diseñar el nuesu propiu castiellu.
Boiling Steel: Un shooter futurísticu
¿La Cuarentena ta dándote estrés? Entós nada meyor pa lliberar adrenalina qu’un shooter. Boiling Steel pue ser una bona alternativa. Esti xuegu d’aspeutu futurista llévanos a una serie de niveles que s’asemeyen a estaciones espaciales y nos que podemos emplegar armes láser.
Gunnman and the Witch: Construir ciudaes nel Far West
Si lo que vos presta ye’l Far West y mercer un poco los xéneros, Gunnman and the Witch ye otru xuegu de baldre que vos lleva a un momentu históricu que se vio milenta veces nes películes: La dómina del antiguu y llonxanu Oeste. Equí vais tener que construyir el típicu pueblu americanu col so Saloon y, tamién, matar a los malos. Cenciellu y tamién de baldre. Podéis facevos con él equí.
Heroes of the Storm: Un moba pa xugar colos amigos
Heroes of the Storm ye un moba de baldre creáu por Blizzard, la mesma empresa que creó otros xuegos tan conocíos como Diablo III, StarCraft, Overwatch, Warcraft o World of Warcraft (WOW). Nesti xuegu vais poder llevar ún de los personaxes de toos esos xuegos nun equipu de cinco xugadores que s’enfrenten a otros cinco. D’esti mou vais poder llevar a personaxes como Sylvannas, Tracer, Anduin, Deathwing, D-VA o Leoric. Caún d’ellos colos sos propios talentos, puntos fuertes y febles.
Amás, diferénciase en gran midida del LoL en munches coses: Nun precises de da-y l’últimu golpe al minion pa llevar la esperiencia, distribuise pente tol equipu. Al aviesu de lo qu’asocede n’otros MOBA, nun ye preciso mercar oxetos y hai un sistema de talentos que fai que puedas tener llibertá de constrir el personaxe como quieras. Los mapes son más pequeños y los oxetivos son más importantes, lo que fai que les partíes seyan más curties. Podéis descargalu equí de baldre.
Command Conquer: Un clásicu de baldre
¿Quién nun s’alcuerda del Command & Cpnquer? Ún de los primeros xuegos d’estratexa de Westwood que yá en 1995 llevábamos a un mundu postapocalípticu nel qu’un nuevu mineral, el Tiberium, invadía campos y viesques envelenando a la xnete. Nesti xuegu vais tener que llevar alantre la campaña d’ún de los dos bandos: La Hermanancia de Nod, o la Iniciativa de Defensa Global. Les dos grandes aliances que s’enfrenten pol control de la nueva fonte d’enerxía con unos medios que raspien la ciencia ficción próxima: Al llau de tanques, jeeps y aviones de combate vais poder remanar tanques llanzallames, tanques invisibles y satélites que disparen a tierra dende l’espaciu. Ye cenciello poder xugar a él online o en primer persona equí.
Neverwinter: Dungeons & Dragons en videoxuegu
Yá falemos d’esti xuegu nel artículu dedicáu a los xuegos de rol qu’acababen tresportaos al formatu videoxuegu. Nerverwinter ye un xuegu de baldre que mos lleva al universu de Dungeons & Dragons. Vamos ponenos nel papel d’un personaxe que faigamos nós dende l’entamu y que tea enxertu nuna de les estremaes clases qu’hai en D&D: ¿Arqueru? ¿Magu? ¿Guerreru? ¿Paladín? Éstes y otres escoyetes podrás faceles nesti xuegu al que pues xugar tanto solu como en grupu, pos trátase d’un MMO. Tiéneslu equí.
Path of Exile: Una alternativa de baldre al Diablo.
Si vos prestó o vos presta’l Diablo de Blizzard, en Path of Exile tenéis una alternativa afayadiza y, sobre manera, de baldre. Una hestoria que mos atrapa y mos lleva a una busca d’aventures mientres que mos enfrentamos a bien d’enemigos de toa triba y nuna dificultá creciente. Esti xuegu podéis descargalu equí.
Otros
¿Tienes recomendaciones? ¿Dalgún xuegu pa convidar a xugar a la comunidá de llectores de Refuelgu? Nun duldes en compartilu nos comentarios.
