Acaba dase la presentación de Microsoft más importante de cada añu, la Xbox Games Showcase, y trai un montonáu de novedaes que vos vamos contar darréu. ¡Garráivos fuerte!
Fable:
Vuelve renovada la saga clásica de fantasía rolera en mundu abiertu, con toques bultables yá nel avance d’esi humor tan peculiar d’ella (pues velu calcando equí). Tovía nun tien fecha d’estrena y les imáxenes de gameplay que podemos ver hasta agora son más bien escases, pero sí paez por elles que va tener un sistema de llucha asemeyáu a la saa The Witcher. Como ye propiedá intelectual de Microsoft, espérase namás pa Xbox y PC.
Avowed:
Obsidian, l’estudiu creador de Fallout: New Vegas, trainos tamién un xuegu de rol medieval-fantásticu que paez dar especial importancia a les decisiones a tomar, la esploración, y l’enfrentamientu con milenta creatures, contra les que vamos poder usar milenta armes y fechizos, incluyendo hasta pistoles. Espérase pa 2024, tamién pa XBOX y PC, y dexámosvos l’avance equí.
Starfield:
Y hai tamién otru xuegu de rol que nun podemos dexar de mentar, pos ye de los más esperaos. Esti, a diferencia de los otros, ye d’ambientación futurista y esploración espacial, permitiéndonos dir de planeta en planeta na nuesa nave no que promete ser un mundu increyiblemente estensu y d’una guapura temenda. Amás de con un montón de tiros y eses coses, claro, amás de que, según cuenten, taría ambientáu nel universu de Fallout (anque unos cuantos sieglos depués). Sal yá en setiembre d’esti añu pa PC y Xbox, y dexámosvos l’avance con gameplay y un vidéu mas llargu (¡de trés cuartos d’hora!) nel que nos cuenten un montonáu de detalles.
Star Wars Outlaws:
Otru xuegu de ficción científica mui esperáu ye esta entrega nueva de la franquicia más multimedia de toes con una hestoria qu’asocede ente la segunda y la tercer película de la saga orixinal. Nella das vida a una delincuente (y el so ayudante) que busca dar el mayor golpe de la so vida, pa lo que tien de tratar con distintes mafies galáctiques y enfrentase al Imperiu. Como podéis ver nel avance, los gráficos pinten espectaculares.
Persona:
Anque cola sorpresa chafada por una filtración Atlus trai dos xuegos de la so franquicia más popular, Persona 3 Reload (avance calcando equí), una versión nueva del xuegu de 2006 colos gráficos perguapos, y Persona 5 Tactica (equí) que como bien indica’l nome ye un xuegu de rol tácticu, con caxellos pelos que se mueven los combatientes. ¡Ah! Y Atlus tamién anuncia Metaphor: Refantazio, otru RPG del equipu de los trés ultimos Persona, de fantasía y con una estética tovía más d’anime (avance equí).
Simuladores:
Y tamién tenemos un nuevu simulador de carreres de la saga Forza pal diez d’ochobre, Forza Motosport (pa Xbox y PC, del que vos dexamos l’avance equí) y la vuelta del clásicu Flight Simulator en 2024, con una versión nueva na que vamos poder manexar aviones de pasaxeros, cisterna, helicópteros de rescate y hasta globos (equí).
Y tovía más:
Hai tantos anuncios que ye difícil asimilalos too, pero tamién tenemos un xuegu d’aición y rol en primer persona con una tremenda temática steampunk, Clockwork Revolution; un hack and slash de Capcom nel que frayamos bichos rarísimos de la mitoloxía xaponesa, Kunitsu-Gami: Path of the Goddess; una primer güeyada a la octava parte de Like a Dragon, xuegu de rol a turnos; y tamién una cinemática de la segunda parte de Hellblade, Senua’s Saga: Hellblade 2, l’aventura d’una muyer sicótica nuna ambientación de mitoloxía nórdica.
