Dixebra, el grupu alredor del que s’articuló’l “Rock Radical Astur” nos ochenta y primeros noventa, cumple anguaño 35 años y va celebralo con una xira y una montonera d’actividaes. Nesti tiempu foi cambiando d’un soníu más punk-rock a otru más mestizu y aprovechamos la ocasión pa falar con Xune, el so cantante, te lo que foron estos 35 años de percorríu.
1987-2021: 35 años nos que cambiaron munches coses. ¿Cómo recuerdes l’Asturies de la dómina, yera meyor o peor que la que tenemos?
L’Asturies d’aquel tiempu taba convulsionada pola repercusión nella de la mal llamada ‘reconversión idustrial’, qu’orixinó miles de paraos y una debacle social fonda. Per otru llau, hubo respuesta a aquella situación en forma de movilizaciones y llucha, en delles ocasiones de manera dura y contundente, lo que xeneró tamién una fola de solidaridá y compañerismu ente los y les trabayadores.
Anguaño, hai unes problemátiques de calter estructural que siguen ehí: esmantelamientu industrial, falta de vertebración territorial, emigración de la mocedá, pocu pesu politicu… pero, pela contra, lo colectivo perdió muncha fuercia frente a lo individual. Nesti sen, l’establishment xugó bien les sos baces, apostó a facenos creyer que la salida yera personal, cuando realmente namás lo común podía y puede salvanos.
“L’Asturies d’aquel tiempu taba convulsionada pola repercusión nella de la mal llamada ‘reconversión idustrial'”
¿Y el grupu Dixebra? ¿Cómo evolucionó o cambió nestes décades? ¿Qué queda del «primer Dixebra» na composición actual y na llinia musical que seguís?
De la primer formación namás quedo yo, pero hai xente que lleva formando parte del grupu dende hai trenta años. D’aquel Dixebra primerizu queda la filosofía cola que nacimos, el querer contar Asturies y cantar a Asturies. Musicalmente la evolución foi pergrande, agora tenemos un soníu definíu y propiu, mui mestizu y abiertu, ganamos en sutileza sonora. En cuantes a les lletres, tamién nos abrimos dende una posición claramente asturianista a un públicu más ampliu.
¿Hai, musicalmente falando, non no llingüístico, un «rock asturianu»? Hai quien apunta la gaita como una seña d’identidá d’esti rock. ¿Cómo lo ves tu?
Necesitaríase daqué más que la utilización de la gaita. El Sueño de Morfeo teníala ente la so instrumentación y paezme mui arriesgáu incluyilos na etiqueta de ‘rock asturianu’. Habría que tener en cuenta otros elementos: temátiques, influyencia de la música tradicional, etc. Otra manera, l’emplegu del asturianu o del gallego-asturianu, por sí solo, yá valdría pa considerar a les bandes qu’echaren mano d’estes llingües como parte del sistema musical asturianu.
Imaxino que nun los sabréis de memoria nin los tendréis contaos pero… 35 años ¿Cuántos conciertos son, más o menos?
Al principiu teníemos una llista onde apuntábemos tolos conciertos, porque yeren dalgo estraordinario pa nós, pero col tiempu, a midida que diba siendo más normal salir a un escenariu, dexámosla. Faciendo un promediu d’estos años calculamos que tarán ente los 500-600, que nun son pocos…
Entamastis con lletres que podíen asitiase perfectamente nel asturianismu más políticu a acabar tocando milenta otros temes ¿Cuál ye’l perfil d’un fan «dixebriegu/a»?
Suel ser abondo variáu, ta la «vieya guardia» más nacionalista que s’identifica con canciones fundamentalmente de la primer época y, colos años, fuimos consiguiendo llegar a sectores mozos mui diversos que vieron en Dixebra un altavoz de les sos lluches: sociales, ecolóxiques, llingüístiques, antirrepresives, llaborales, feministes…
“lo más importante va ser la publicación del trabayu nuevu, un discu-llibru tituláu Ente la niebla, con venti temes orixinales”
¿Qué proyeutos tenéis agora?
De mano, festexar esti 35 aniversariu con una serie d’actividaes a desenvolver a lo llargo del añu. Ente elles una esposición pa la primavera, producir un documental sobre la banda y tolo que la arrodia, una xira con dellos conciertos especiales o un llibru llibru sobre’l contestu y circunstancies nes que Dixebra tuvo que desenvolver el so llabor. Pero lo más importante va ser la publicación del trabayu nuevu, un discu-llibru tituláu Ente la niebla, con venti temes orixinales que xiren alredor de la historia de les clases populares asturianes, nel que collaboren historiadores, periodistes o escritores.
Falando del panorama musical n’asturianu, ¿cómo ves la situación actual?
La música asturiana sigue viva y creando, que nun ye poco. La falta d’apoyu institucional suplióse cola autoxestión y el voluntarismu de muncha xente implicao. La so fortaleza ta nello precisamente, na militancia musical, na voluntá de ser y existir. Per otru llau, l’alministración y los poderes públicos del país habíen d’ayudar a llegar onde por nós mesmos nun somos quien. Les potencialidaes de la música asturiana tán tovía ensin esplotar, interna y esternamente.
¿Tamos meyor o peor que va 20 años?
Tamos igual. Los responsables políticos nun tienen una visión clara de lo que representa la música asturiana, al traviés d’ella puede estructurase un sector económicu curiosu y tamién convertila nun elementu de promoción del país a nivel internacional. Fai falta una política musical de verdá, permanente y decidida, con acciones realmente granibles y con xente que sepa lo que tien ente manes.
¿Y no político?
Paecía que venía un tiempu nuevu, con un recambiu xeneracional, pero, de momentu, nun se ta viendo que se concrete en nada, namás hai bones palabres… Los que llevamos años lluchando por otra visión d’Asturies nun nos conformamos con que nos «afalaguen» l’oyíu, queremos seriedá y resultaos apalpables.
“Paecía que venía un tiempu nuevu, con un recambiu xeneracional, pero, de momentu, nun se ta viendo que se concrete en nada, namás hai bones palabres”
Llama l’atención que munchos de los premios a meyor cantar gánalos el folk. Va unos años nomaben a «Los fayeos de mayu» como’l meyor cantar n’asturianu: ¿hai un escesu de folk o una falta d’otres músiques n’asturianu?
El folk asturianu ye ún de los movimientos musicales más importantes na historia d’Asturies, tuvo y tien una trescendencia que nun llogró nenguna otra escena sonora del país. Por suerte, anguaño, el panorama musical propiu diversificóse de manera esponencial y eso ye bono enforma. Agora hai milenta maneres d’entender y rellacionate cola música asturiana. De toes maneres, sigue habiendo carencies, falta conectar coles xeneraciones más nueves, llegar a elles coles sos músiques y les sos estétiques sonores. Nun queda otro si queremos que la música y les llingües del país tengan futuru.
“El folk asturianu […] tuvo y tien una trescendencia que nun llogró nenguna otra escena sonora del país”
Dixebra perpasó les fronteres d’Asturies y, en dellos ámbitos polo menos, conozse fuera de les nuestres llendes. La música ye un idioma universal pero… ¿crees que la música asturiana llega tolo lloñe que podría?
La música asturiana, en determinaos ámbitos internacionales, yá ye un símbolu del nuestru país, la so repercusión na comunidá celta ye tou un exemplu d’ello. Los grupos y solistes asturianos movémonos pel mundu alantre con total naturalidá y constantemente, con ello convertímonos n’embaxadores del país; cuando actuamos fuera de les nuestres fronteres non solo llevamos la música, con nós va’l paisaxe, la gastronomía, la cultura… en definitiva la imaxe de país. El Gobiernu Asturianu habría ser consciente d’ello y apoyalo fondamente, ayudando a esternalizar tovía más la música asturiana, tando presente nos principales eventos internacionales (festivales, feries, alcuentros, etc.), promocionándola y valorándola como se merez.
¿Hai continuidá a la xera de Dixebra? ¿Qué bandes te llamen l’atención de les que faen rock n’asturianu?
Anguaño, tenemos un garrapiellu curiosu de grupos rockeros qu’utilicen l’asturianu o’l gallego-asturianu nes sos lletres, convivimos bandes veteranes con otres noveles y eso ye mui bono porque posibilita’l poder falar d’una escena de rock asturianu. Hai años, como muncho, podía coincidir que dos o tres grupos de rock cantáremos n’asturianu, pero agora yá son unos cuantos más. En cuanto a nomes, sería inxusto dexar fuera a dalguna d’eses formaciones; prefiero manda-yos un mensaxe d’apoyu y el deséu de que sigan trabayando y faciendo que les nuestres llingües seyan, tamién, rockeres.
