Va unos díes presentóse l’Archivu de la Música Contemporánea Asturiana (AMCA). La iniciativa sigue’l camín que dibuxaron los munchos y variaos archivos de la música tradicional. En cuenta de recoyer documentos sonoros de calter tradicional, l’AMCA céntrase na música d’espresión asturiana que se fixo nes últimes décades. Entrevistamos a Xune Elipe, una de les cabeces que tán darrera esti proyectu.
¿Cómo surdió la idea d’entamar l’AMCA? ¿Hai exemplos asemeyaos n’otros países?
La idea llevaba tiempu dándome vueltes na cabeza, pero faciendo la serie documental sobre la historia de la música asturiana D’ayeri a güei foi cuando decidí que yá yera hora de facer realidá esti proyectu. Ello ye qu’ente la mio colección particular -atropada a lo llargo de cuatro décades- y el procesu de documentación del programa, nel qu’atopé y axunté bien de coses, decatéme qu’había yá de mano una cantidá de material bien bayurosu y interesante col qu’echar a andar un archivu d’estes característiques.
N’otros llugares nun conozo una iniciativa exáctamente igual a esta, lo que sí hai son proyectos paecíos, pero lléndense a la música estrictamente actual. Nós abarcamos un periodu temporal de cincuenta años, que ye cuando se produz el nacimientu de lo que podríemos considerar música d’espresión asturiana contemporánea.
Cuando lu presentastis, dixistis que lo que buscáis ye «valir d’escaparate y estudiu de la llamada música d’espresión asturiana qu’a partir de 1974, añu del orixe del asturianismu modernu cola creación de Conceyu Bable, apaez na escena del país». ¿Qué forma va garrar esi archivu? ¿Va ser una páxina na que se pueden sentir cantares de toles époques?
Queremos dir pasín ente pasu, vamos principiar con un sitiu dixital na páxina musicasturiana.com, que va reconvertise nel gran portal dedicáu a la música asturiana. Ehí vamos dir asoleyando los materiales de calter sonoru nun primer momentu, con especial atención a grabaciones en directo que nunca enantes se dieren a conocer, como conciertos, alcuentros, festivales… (dende ediciones del históricu Día de la Cultura de Xixón a Nueches Celtes de llugares estremaos, por exemplu). A ello hai qu’añader una colección perimportante de maquetes que van dende los años 80 hasta anguaño, la gran mayoría de grupos que namás llegaríen a grabar una amuesa del so trabayu nun formatu caseru y depués desfairíense. Tamién van ufiertase entrevistes feches a lo llargo d’años de munchos de los protagonistes de la escena sonora del país, asina como materiales de calter audiovisual o bibliográficu. Contamos con que cada componente del AMCA que se dea a conocer lleve una presentación na que s’esplique qué ye y se trate’l so contestu.
¿Los usuarios van poder dir al AMCA y oyer los cantares que quieren? ¿Cómo se fai eso na normativa actual de drechos d’autor?
L’AMCA naz con voluntá de serviciu públicu. Nesti sen, queremos convertinos nuna fonte de consulta, publicidá y estudiu del fechu musical asturianu y/o n’asturianu y gallego-asturianu dende mediaos de los años 70 hasta güei. Tolos materiales van poder sentise o vese llibremente, otra cuestión aparte ye poder baxalos o facese con ellos. De munchos tenemos nós los derechos, pero d’otros non, poro, pa evitar problemes llegales l’AMCA plantégase como un escaparate onde tener accesu a ellos, onde poder consultalos o simplemente disfrutalos, pero nada más.
¿Tenemos una idea aproximada de cuántos cantares y grupos puede suponer el conxuntu de la música d’espresión asturiana de 1974 a 2021?
L’AMCA va ser muncho más que cantares, tien un oxetivu más ampliu y global. La bayura y diversidá de la música asturiana dende’l Surdimientu hasta agora ye inmensa, ta tovía por clasificar. Un país pequeñín como Asturies, con un millón d’habitantes, desarrolló una escena musical propia realmente importante y fai mui difícil siquiera dar un númberu aproximáu d’ello.
Amás del propiu archivu sonoru faláis tamién de que l’AMCA va contar con otres coses como podríen ser la cartelería, programes de mano, cartafueyos, revistes… ¿Ónde van poder consultase toes estes coses? ¿Aspiráis a tener una sede física?
Efectivamente, el nuestru enfotu, como dicía enantes, ye dir más allá de lo meramente sonoro, tamién queremos abarcar otros aspectos como lo audiovisual o bibliográfico. Nesti sen, por exemplu, tenemos ente los fondos del AMCA toles revistes apaecíes nes últimes cuatro décades dedicaes específicamente a la música del país (Al Son, Al Debalu, MusicAst, Alcordances, Payel.la, L’Asturianada, etc.). Vamos dir ufiertando una especie de catálogu del archivu pa que la xente sepa lo qu’hai y pueda consultalo. Lo de la sede física yá se verá, yera lo suyo, pero vamos dir adulces, primero dar a conocer l’AMCA y les posibilidaes que tien y depués yá veremos…
¿Cómo se financia una iniciativa d’estes característiques? ¿Vais contar col sofitu de les instituciones?
L’AMCA naz como una iniciativa privada que surde de la collaboración de dos empreses mui venceyaes a la música del país: Goxe Producciones y Mecigaya Creativa. De mano vamos entamar una serie de reuniones con responsables de la política cultural pa presenta-yos el proyectu, que lu conozan y valoren, y ver de qué manera pueden apoyalu. Pel momentu la financiación ye dafechu propia, como la dixitalización de les grabaciones y los materiales físicos.
¿Cómo ves la evolución de la música contemporánea asturiana de 1974 p’acá? ¿Vamos a más o a menos? ¿Hai una estabilidá o un segundu surdimientu?
Hai una primer época onde se produz la nacencia de la música d’espresión asturiana contemporánea, que ta marcada pola creación de Conceyu Bable a mediaos de lo años 70 y l’apaición del Nuevu Canciu. Posteriormente, nos 80, apaez el movimientu musical más importante hasta la fecha n’Asturies: el folk de calter atlánticu. Nos 90 produzse’l gran boom de la música asturiana, que tien a Hevia como cabezaleru, pero la crisis del añu 2008 llevó per delantre munches de les manifestaciones de la nuestra música (grupos, nueches celtes, festivales, escueles…). Agora, depués de la nuestra travesía del desiertu particular, principia a vese un espolletar nuevu y, dalgo que ye perimportante y hasta imprescindible, una anovación nes formes y maneres d’entender lo que ye la música asturiana, muncho más abierta y diversa. De toes maneres, falta ciertu relevu xeneracional y por eso ye tan importante dar a conocer lo que se fixo y los antecedentes qu’hai, pa qu’esa mocedá que quiera incorporase a la música asturiana tenga una base sólida.
Munches veces ponse la lliteratura como exemplu del desendolcu de la creación artística n’asturianu. ¿Pienses que la música ta a la par, más o menos desendolcada? ¿Traduzse eso en más oyentes y siguidores?
La lliteratura n’asturianu tuvo un papel perimportante na recuperación del idioma, pero más a nivel de prestixu en ciertos círculos qu’ente la sociedá. Creo que la música, pela cueta, foi muncho más popular y supo llegar mayoritariamente a la población, nun hai más que ver les ventes de discos n’asturianu y de llibros nesta llingua que se daben. Ye verdá que son dos cuestiones que nun se pueden comparar, dao que la llectura requier un esfuerciu mayor que la escucha, pero una gran parte del puxu del movimientu de reivindicación llingüística débese a la música.
¿Cómo ves la música contemporánea d’espresión asturiana dientro de 10 ó 20 años?
Viva, que yá ye muncho dicir. Y va talo porque enantes semóse, trabayóse abondo y deprendió a desenvolvese nun contestu políticu-alministrativu nada afayadizu, cuando non foscu. Si llegamos hasta equí gracies al nuestru esfuerciu individual y colectivu y a la llealtá del públicu bien podemos aguantar y ameyorar. Hai futuru.
