Star Citizen, sobren les presentaciones, ye’l xuegu más esperáu de toos. Y sí, dicimos esperáu, porque ye un xuegu que ta faciéndose esperar quiciabes demasiao. El xuegu anuncióse en 2012, va yá más d’ocho años y presentóse como un proyeutu de crowdfunding. Esta campaña de mecenalgu sorprendía a tol mundu al recaldar millones y millones de dólares y lleva agora más de 300 millones d’euros recaldaos, lo que lu convierte nel mecenalgu más grande de la hestoria de los videoxuegos.
Sicasí, anque les cifres de recaldación seyan pergrandes, lo cierto ye que Star Citizen nun tien entá fecha de salida nin s’espera que la tenga nos próximos años. Pero pa entender qué pasó, hai que dir al entamu de too y saber que’l que ta darrera nun ye otru que Chris Roberts, quien creare videoxuegos nos 90 como Wing Commander o Freelancer.
Apasionáu de los videoxuegos espaciales, Chris Roberts consideró en 2012 que la teunoloxía de los ordenadores taba yá nun puntu que facía posible llanzar un proyeutu perambiciosu como yera Star Citizen. ¿L’oxetivu? Nun yera otru que crear un simulador espacial. Pero non un simulador espacial nel que val con xubir a una nave y pilotala. La idea de Star Citizen ye la de convertise nun verdaderu mundu nel que non solo seya posible pilotar naves – un aspeutu perimportante de los videoxuegos espaciales – sinón, tamién, comerciar, falar, caleyar, disparar… y, en definitiva, tener toles carauterístiques d’un xuegu RPG.
Un proyeutu descomanáu
La nacencia de Star Citizen – o del proyeutu de Star Citizen, pos Star Citizen nun ye más qu’un “fetu” n’estáu de xestación – produzse como consecuencia de la imposibilidá pela parte de les compañíes de videoxuegos tradicionales de financiar un proyeutu d’esti grandor. Sicasí, l’éxitu del proyeutu perpasa en muncho les espeutatives más ambicioses, lo que llevó a Chris Roberts a reformulalu y amplialu. De ser un xuegu pasa a ser dos: un MMO: Star Citizen y una campaña individual: Squadron 42. Tres de fundar la empresa que diba desendolcalu,; Robert Space Industries, la compañía tien recaldaos yá más de 300 millones de dólares y da emplegu a más de 600 persones a lo llargo y ancho del planeta.
Les aspiraciones de Star Citizen son les de convertise nuna especie de – salvando muncho les distancies – WOW espacial lo más realista posible. Nesti universu podríemos exercer profesiones como les de soldáu, repartidor de mercancía en nave espacial, investigador policial, un contrabandista, un lladrón y bien d’otres. La idea ye esa: sacar un simulador de cómo sería vivir nun mundu espacial nel que la civilización colonizó bien de planetes y llunes a lo llargo y ancho d’una galaxia.
Pa consiguilo, Star Citizen aspira a que seyamos ciudadanos con un DNI – hasta organizaron eleiciones a Emperador Galácticu va poco – una cuenta corriente con créditos espaciales y una nave que xugaría’l rol, más o menos qu’un coche priváu xuega nel nuesu mundu real. Planetes qu’esplorar, misiones que facer, contratos a los qu’aportar, guerres… en xeneral, un mundu enteru y virtual que diba tener vida propia en tolos aspeutos: personal, políticu, económicu etc…
¿Una estafa piramidal o un alfa eternu?
Sicasí, los resultaos que dio hasta agora Star Citizen nun tán al altor de lo que promete. Bien ye cierto que l’ambición y el proyeutu yeren grandes, pero lo cierto ye que depués d’ocho años de desendolcu, llevamos yá práuticamente dos de parón. Nun ye que nun se faiga nada, sinón que lo que ta saliendo últimamente son más bien anuncios y cáscares baleres. Tenemos planetes perguapos y estaciones espaciales impresionantes; pero nun hai nengún tipu de conteníu. Les misiones son repetitives y esto ye lo meyor que pue dicise d’elles, ¿Lo peor? L’escesu de fallos y problemes qu’hai ún tres d’otru – cosa lóxica, otra manera, pos tamos falando d’un alfa y non d’un xuegu peracabáu – que faen que la esperiencia de xuegu seya entre probe, ruina y horrible según la suerte qu’ún tenga.
El xuegu tien asoleyada una “Fueya de Ruta” o “Roadmap” que llamen; pero en cuenta de desplicar les fases previstes, nun fai más que recopilar les pasaes. Star Citizen nun tien fecha d’entrega nin tien fecha de salida de la versión Beta nin, siquiera, de mou aproximáu. Convirtióse nun “alfa eternu” ensin práuticamente, nenguna ambición de salir d’él. Y, mentanto, la competencia ta trabayando en proyeutos asemeyaos, menos ambiciosos – ta claro – pero muncho más asumibles y posibles de desendolcar como’l Starfield de Bethesda, que ta en fase de desendolcu y tien intención de salir al mercáu nos próximos años.
L’alfa paga la pena, el preciu non.
Pero nun son too coses males a la hora de falar de Star Citizen. El xuegu, como ta tovía en fas de crowdfunding, ufierta delles maneres de sofitalu. Estes maneres son pagando una cantidá que, como poco, anda cerca los 40-50€ y que da derechu a tener una cantidá de perres del xuegu nel momentu que salga amás d’una nave espacial concreta. El que quiera collaborar con más perres, puede consiguir naves espaciales muncho meyores, más fuertes y rápides y/o más perres nel xuegu coles que mercar éstes y otres coses.
Dende’l momentu en que pagamos y mos convertimos en mecenes d’eti proyeutu, podemos descargalu y xugar. Esto va llevanos a ún de los espaciopuertos de la galaxia, onde vamos alborecer nuna cama nun cuartu. D’ehí, vamos poder esplorar l’espaciupuertu, recibir misiones, garrar la nuesa nave – o otres que mos dexen probar a lo llargo del alfa – y consiguir perres del xuegu, gastales n’armes y armadures o, inclusive, aforrar p’ameyorar la nave o mercar otra nueva.
Lo cierto ye que los planetes tán bien trabayaos y los gráficos son esceicionales pa lo que tamos avezaos a ver en MMOs. Les naves remánense bien y son bien prestoses de guiar; amás, ye interesante ver l’interior d’unes y otres y ver cómo cambien: Hai dende caces espaciales perpequeños a naves espaciales que tienen hangares y capacidá d’agospiar a otres. Ente dambos estremos, naves de comerciu con asientos pa más d’una persona (que podemos compartir con amigos), bodegues de carga, cames y hasta máquina pa facer el café. A lo último, Star Citizen integró un sistema bien realista de simulación de necesidaes fisiolóxiques como beber o comer, amás d’una serie de traxes y llugares estremos nos que ye preciso abrigase o refrixerase.
4 años de retrasu son abondos
La parte de campaña, Squadron 42, taba prevista p’asoleyase en 2016 y lleven yá cuatro años de retrasu. Esti retrasu, qu’anque grande, podría entendese o llegar a tolerase, nun fai más qu’axuntase a otros munchos retrasos que la compañía foi acumulando en bien de coses. En munches ocasiones, los roadmaps cancelaben coses qu’anunciaben que diben facer ensin xustificación aparente. Mientres pasaba esto, nes CitizenCon (l’equivalente de la E3 o la BlizzardCon de Robert Space Industries) nun dexaben de presentase naves nueves con precios descomanaos que la xente mercaba – y coles que se repetía una y otra vez esti esquema -. D’ehí que mos entruguemos si tamos o non énte una estafa piramidal.
Nun lo sabemos. Puede ser que teamos ente una, y puede que seya más por una cuestión de mala organización y incompetencia que por mala voluntá, pero anque Star Citizen presta muncho lo que salió hasta agora, nun ye menos cierto que nun paez que seya realista pensar qu’esti xuegu va acabar saliendo depués d’ocho años de desendolcu y 4 de retrasos. La nuesa valoración final ye que, si pienses que te compensa xugar a l’alfa, da-y, porque pa lo que ye un alfa ye bien prestosa. Pero si lo que quies ye un xuegu y paezte un abusu pagar 40-50€ por ún que ye difícil que venga, entós ye meyor que teas tolo lloñe posible d’esti títulu.
