¿Y Tu? ¿Qué yes? ¿Lannister, Targaryen o Stark? ¿Gryffindor, Hufflepuff, Ravenclaw o Slytherin? ¿Malkavian, Toreador, Tremere, Ventrue, Brujah…? Paez como aquel anunciu de va unes décades de si yeres del “Kas Naranxa” o del “Kas Llimón”. El casu ye qu’anque en munches obres de fantasía y ciencia ficción acabe habiendo’l clásicu confliutu ente “bonos” y malos”‘ como pasa por exemplu n’El Señor de los Aniellos, en Star Wars o hasta en Harry Potter, lo cierto ye queen munches obres de fantasía surden una serie de Clanes, Cases o Grupos humanos.
Los clanes en Xuegu de Tronos
Quiciabes la más reciente d’estes obres de ficción seya Xuegu de Tronos. Nella hai bien de clanes (mayores y menores) unos subordinaos a otros, pero hai trés que rescamplen pola importancia: Stark, Targaryen y Lannister. Caún d’ellos tien una serie de virtúes que lu fai ser atractivu. Esto ye, anque toos tengan un llau negativu (los Stark son mui inocentes, los Targaryen llocos…) tienen tamién un aspeutu positivu que podríemos asimilar a la llealtá nel casu de los Stark, de la intelixencia nel de los Lannister y de la voluntá y la capacidá de sobreponese a les dificultaes nel casu de los Targaryen.
Ta claro, los personaxes son complexos y en toles “cases” de Xuegu de Tronos hai regles y esceiciones. Pero ye cierto que nos clanes hai un ciertu “aire de familia” (cosa lóxica, porque son families con una educación asemeyada). En xeneral estos clanes nun tienen namás una serie de virtúes (y dacuando un defeutu), sinón que tamién son fácilmente identificables per aciu de colores o símbolos. Toos recordamos los llobos de los Stark o los lliones de los Targaryen.
Los clanes nel rol
Ye asemeyáu’l casu n’otres obres de ficción. Vémoslo en Vampiru: La mascarada; onde hai clanes como los Malkavian que tienen la mesma negatividá que tienen los Targaryen (la llocura) pero presentando otres carauterístiques positives. Toreador, Brujah, Nosferatu… toos tienen les sos cualidaes y les sos habilidaes, que faen que caún d’estos clanes tenga non solo una riestra de poderes específicos; sinón tamién una actitú frente a los demás o a la vida.
N’otros xuegos como la Lleenda de los 5 Aniellos (Legend of the Five Rings), de temática xaponesa-oriental; vemos cómo los clanes, que tamién tienen colores y animales (como en Xuegu de tronos) tienen caún d’ellos una filosofía de vida y una serie de valores. Pa unos lo más importante ye la llealtá, pa otros l’honor, pa otros la sabiduría, pa otros la cortesía… Y nun ye namás qu’esto vaiga determinar l’actitú pa coles demás persones; sinón, tamién, les enseñances y habilidaes de caún de los clanes. Una escuela de samurais basada nel honor va tener unes táutiques de guerra honorables.
Les cases de Harry Potter.
En Harry Potter, el gran clásicu de la lliteratura infantil y xuvenil, vemos tamién el mesmu patrón: Un águila, un melandru, un llión y una culiebra que representen, caún d’ellos con un color (azul, mariellu, coloráu y verde) a una de les cases. Estes cases tienen tamién una serie de valores que les faen destacar perriba de les demás: El bravén de los Griffindor, la llealtá de los Hufflepuff, la intelixencia de los Ravenclaw, l’ambición de los Slytherin. Cualidaes toes elles positives, anque puedan venir, dacuando, con unos rasgos negativos.
¿Por qué pasa esto?
¿Pero por qué pasa esto? ¿Por qué tantes obres de ficción del rol, la fantasía o la ciencia ficción presenten un mundu nel que se clasifica a les persones acordies con una serie de ventayes y desventayes y unes carauterístiques que, en munches ocasiones, acaben asociándose de dalguna manera a los animales que representen. En Refuelgu quiximos entrugar a una serie de persones relevantes na lliteratura asturiana, especialmente na parte que tien que ver col análisis y la reflexión, sobre por qué pasa eso.
P’Aymara González, de Llar de Llibros, la cuestión darrera diba ser sicolóxica. “pertenecer a un grupu, al que se-y ponen X cualidaes que pueden corresponder coles ya desendolcaes o non personalmente…” L’análisis que fai Aymara ye perspositivu, pos considera que “ye una de les ferramientes más intelixentes de la lliteratura, porque tamién xenera más empatía cola hestoria y hai más implicación por parte del llector”. D’esti mou, nuna novela coral tan grande como Xuegu de Tronos, o nuna serie del llargor de Harry Potter, la esistencia d’una bayura de clanes/cases y de personaxes fadría que cada persona, acordies coles sos vivencies, tuviere más apegu por unos y los otros.
Lo cierto ye qu’esta visión sedría mui afayadiza pa los xuegos de rol; onde los personaxes de los xugadores son dellos y nun hai “un” protagonista (pos el rol faise polo xeneral en grupu) y caún de los xugadores suel escoyer el que más s’axusta a los sos valores. Tamién puede ser una forma d’esplorar arquetipos.
Pel contrario, pa Laura Marcos, responsable del espaciu “La Clá Invisible“, la cuestión más que cola identificación tendría que ver col conceutu de “performance”. Pa ella la ficción y la fantasía sedríen más cencielles que la via real y defende la esistencia d’un planu estremáu pa la ficción de la realidá. Pa ella la ficción sedría “muncho más simple que la vida real y tamién ye más atractivo”. D’esti mou, llevar la camiseta d’un Lannister sedría pa Laura Marcos una “performance” del planu de la fantasía.
¿Y vosotros/es qué pensáis? ¿Hai clanes, cases o asemeyao na lliteratura asturiana?
