La visión de Zack Snyder de lo que tenía de ser l’universu cinematográficu de DC acabó en burrera, pos depués de dirixir The Man of Steel 8el rellanzamientu de Superman) y Batman v Superman: Dawn of Justice (l’enfrentamientu físicu de los dos grandes héroes de DC) diben dir, pelo menos, dos películes de Justice League cola so visión tan particular. Por embargu, y anque la recaldación d’estes foi bona, les películes recibieron munches crítiques por escures, murnies y falsamente fondes, por más que tamién-yos salieron dellos defensores acérrimes d’esa visión “más adulta” que la de les películes de Marvel. Cuando a esto s’amestó que los estudios nun víen con bonos güeyos lo que Snyder taba faciendo cola so tercer película de les franquicies comiqueres, que paecíen dir tovía más pel mesmu camín, sustituyéronlu cola película a medio facer por Joss Whedon, pa que tratara d’iguar les coses primero de ser sero. Y asina, cola película criticada por unos y por otros, el reináu de Snyder acabó y l’Universu DC escomenzó a paecer dir al debalu hasta qu’apocayá lu punxeron en manes de James Gunn.
Mentanto, una campaña fuerte y que pue considerase hasta agresiva en redes (na que, como cuenta Rolling Stone equí, usáronse bots y Snyder llegó a amenazar a Warner con destruyir la so reputación) fizo que la productora gastara otros setenta millones de dólares en sacar la película talamente como quería Snyder, The Snyder Cut, cuatro hores direutes a HBO Max y que vieron dos millones doscientes mil persones na primer selmana. Teniendo en cuenta otres estrenes na canal, como la de The Batman de Matt Reeves (depués de salir nos cines) y qu’algamó los cuatro millones cien mil, l’ésitu pue considerase bastante moderáu.
Y magar too esto, agora Snyder sentencia que lo que pasó ye que’l públicu nun entendía lo qu’él taba faciendo. Como recueye The Direct (nesta noticia), considera que la xente foi al cine a ver Batman v. Superman como otra película más de superhéroes cola que divertise, pero qu’él, pela cueta, dio-yos una “obra esperimental de mitoloxía superheroica, deconstructivista y con munches capes, a la qu’has poner atención”. Esto, según él, paeció cansoso a la xente, que quería una película cenciella, y entrugábense ensin entender el fondu coses como por qué teníen de pegase los héroes de nueche y non a la lluz del día.
Anguaño, tres de la estrena de dos películes pa Netflix ambientaes nun mesmu universu, Army of the Dead y Army of Thieves, Snyder tien pa estrenar n’avientu, tamién nesta canal, Rebel Moon, una space opera con Sofia Boutella como protagonista.
